ಸಂಕಮಕ್ಕ ಪಾತೆರುಜೆರ್ಗೆ

(ಆಕಾಶವಾಣಿ ಮಂಗಳೂರು ಕೇಂದ್ರೊಡು ಯಾನ್ ಓದುದಿನ ಕತೆ )

ಸಂಕಮಕ್ಕ ಇತ್ತೆ ಪಾತೆರುನ ಕಮ್ಮಿ ಮಲ್ದೆರ್. ಏರಾಂಡಲಾ ಮೋನೆ ತೂದು 'ದಾನೆ ಸಂಕಮಕ್ಕಾಂದ್' ಕೇಂಡ ಅರೆನ ಬಿಮ್ಮ ಒಂಚೂರು ಪಂದುನತ್ತಾಂದೆ ದುಂಬುದಲೆಕ್ಕ ಪೊಲರ್ುದ ತೆಲ್ಕೆ ತೆಲ್ತ್ದ್ 'ದಾನೆ ಮಗ ಒಂಚಿ ಪಿದಾಡಿಯಾ? ಪಂದ್ ಸುರು ಮಲ್ತೆರ್ಡ, ಆರ್ ಆನಿ ಪುಲ್ಯಕಾಂಡೆ ಲಕ್ಕಿನೆಡ್ದಿಂಚಿದ ಸುದ್ದಿಲೆನ್ ಮಾತಾ ಪಾತೆರೊಂದು ನಡುಟ್ಟ್ ಅರೆನ ಪುಲ್ಲಿ ಶಂಕರನ್ ಒಯ್ತ್ ಕನತ್ತ್ದ್, ಆಯನೊಂಜಿ ಆತ್ ಪುಗರ್ಜಿಡ ಅರೆಗೆ ಪಾತೆರ್ನ ಪಾತೆರ್ಲೆಕ ಅವೊಂದಿತ್ತಜಿ.
ಅವು ಅಂದ್, ಆರ್ ಅರೆನ ಪುಲ್ಲಿ ಶಂಕನರನ್ ದಾಯೆ ಪುಗರುನು, ಅರೆನ ಪುಲ್ಲಿನ್ ಪುಗರಿಯೆರ್ಡ ನಮಕ್ಕ್ ದಾನೆ ತೊಂದರೆ. ನಮ್ಮ ಅಪ್ಪೆ ನಮನ್ ಪುಗರುಜೆರಾ?
ಶಂಕರನ ಅಪ್ಪೆ... ಪಂಡ ಶಂಕರೆ ಸಂಕಮಕ್ಕನ್ ಅಂಚೆನೇ ಲೆಪ್ಪುನು. ಆರ್ ಶಂಕರನ್ ಪುಗರ್ಯೆರೆ ಮಲ್ಲ ಕಾರ್ನ ಉಂಡು. ಅವು ದಾದ ಪಂಡ ಶಂಕರನ್ ಬುಡುಂಡ ಸಂಕಮಕ್ಕಗ್ ಆರ್ನಕುಲು ಪಂಡ್ದ್ ಏರ್ಲಾ ಇಜ್ಜಿ. ಶಂಕರೆ ಅರೆನ ಜೀವದ ಗಂಟ್. ಶಂಕರೆ ಇಜ್ಜೆ ಪಂಡ್ದಾಂಡ ಸಂಕಮಕ್ಕ ಒಂಜಿ ಗಲಿಗೆಲಾ ಬದ್ಕಯರ್ಂದೇ ಪನೊಲಿ.
ಅಂಚಾಂಡ ಶಂಕರಗ್ ಅಮ್ಮೆ, ತಮ್ಮಲೆ ಪಂದ್ ಏರ್ಲಾ ಇಜ್ಜಾಂದ್ ಕೇನರ್. ಇತ್ತೆದ ಮಟ್ಟ್ಗ್ ಏರ್ಲಾ ಇಜ್ಜಿಂದೇ ಪನೊಲಿ. ಶಂಕರನ ಅಜ್ಜೆರ್ ಪಂಡ ಸಂಕಮಕ್ಕನ ಕಂಡನೆ ಕೊಗ್ಗಣ್ಣೆ ದುಂಬುದ ಕಾಲೊಡು ಚಿಲ್ಲರೆ ನರಮಾನಿ ಮಿನಿ ಅತ್ತ್. ಬಡಪತ್ತದ ಇಲ್ಲಡ್ ಪುಟ್ಟುಂಡಲಾ ಎಡೇನ ಬೇಲೆ ಬೆಂದ್ದ್, ಆರ್ನನೇ ಸ್ವಂತ ಬೆನ್ನಿ ಮಲ್ತದ್ ತೂಪಾಯಿನ ಆನ್ ಮಗೇಂದೇ ಪನೊಲಿ. ಕಾರ್ಲದ ಪೇಂಟೆಡ್ ವಾ ನಮೂನೆದ ಗೌಜಿ, ಕುಸೆಲ್ ನಡಪೊಡ್ಡಲಾ ಅಯ್ತ ಪಿರಾವುಡು ಕೊಗ್ಗಣ್ಣನ ಕೈ ಉಪ್ಪೊಡೇ ಪನ್ಪಿನ ಕಾಲ ಅವು. ಕೊಗ್ಗಣ್ಣನ ಬಿಸರ್ಾತಿಗೆ ತೂದು ಪಡ್ಡೆದ್ರದ ಕರಿಯಣ್ಣೆ ಆರ್ನ ಒತರ್ಿಯೇ ಮಗಲ್ ಸಂಕಮ್ಮನ್ ಧಾರೆ ಮೈಯ್ತ್ ಕೊರ್ದಿತ್ತೆರ್.
ಬೊಡ್ಚಾಂದಿನ ದುರಾಭ್ಯಾಸೊಲು ಮಿನಿ ದಾಲಾ ಕೊಗ್ಗಗ್ ಇತ್ತ್ಜಿ. ಆಂಡ ಕಂಬುಲದ ಒಂಜಿ ಮರ್ಲ್ ಇತ್ತಂಡ್. ವಾ ಊರುಡು ಕಂಬುಲ ಆಂಡಲಾ ಕೊಗ್ಗೆ ಉಪ್ಪುವನೇ. ಖಾಲಿ ಉಪ್ಪುನು ಮಾತ್ರ ಅತ್ತ್. ಗೋಳಿದಡಿ ತ್ಯಾಂಪಣ್ಣೆರ್ನ ಗಿಡ್ದೆರುತ್ತ ಮೂಕುದ ಬಲ್ಲ್ಲಾ ಕೊಗ್ಗನ ಕೈಯ್ಟೇ ಇತ್ತ್ಂಡ್.
ಗಿಡ್ದೆರ್ಲೆನ್ ಗಂತ್ಡ್ ಸಕರ್ೆಗ್ ಉಂತಾವೊಡ್ಡ ಕೊಗ್ಗಣ್ಣೆ ಬೋಡೆ. 'ಅಲಾ... ಬುಡ್ಲಾ...'ಂದ್ ಪನ್ಪಿನ ಕೊಗ್ಗಣ್ಣನ ಅರಬೈ ಕೇಂದೇ ತ್ಯಾಂಪಣ್ಣನ ಎರ್ಲು ಒಂಜೇ ದಂಬುಡು 'ಮಂಜೊಟ್ಟಿ'ಗ್ ಕಾರ್ ದೀವೊಂದಿತ್ತ. ಕೊಗ್ಗಣ್ಣನ ಬಿಸರ್ಾತಿಕೆಡ್ ತ್ಯಾಂಪಣ್ಣೆರ್ನ ಎರ್ಲು ಮಸ್ತ್ ಮೆಡಲ್ ಆಕ್ದಿತ್ತ. ತ್ಯಾಂಪಣ್ಣನ ಎರ್ಲೆದ ಮಿತ್ತ್ ಕೊಗ್ಗಣ್ಣಗ್ ಏತ್ ವಿಶ್ವಾಸ ಪಂಡ ಅಯಿಕ್ಲೆನ ಪಿರಾವುಡು ಏತ್ ದುಡ್ಡು ಕಟ್ಟೆರ್ಲಾ ಆರ್ ತಯಾರಿತ್ತೆರ್.
ಸೋಲು-ಗೆಲ್ಮೆ ಇತ್ತಿನವೇ ತ್ಯಾಂಪಣ್ಣೆರ್ನ ಎರ್ಲೆನ 'ಪರು' ಎಚ್ಚಾವೊಂದಿತ್ತಿಲೆಕ್ಕನೇ ಅಯ್ಕ್ಲೆಗೆ 'ಮಂಜೊಟ್ಟಿ' ದೂರ ಆವೆರೆ ಸುರುವಾಂಡ್. ಕೊಗ್ಗಣ್ಣೆ ಅಯ್ತ ಪಿರಾವುಡು ಕಟ್ಟಿನ ದೂದು ಸೋಲ್ಪೆರೆ ಸುರವಾಂಡ್. ಆರ್ ಬಂಗ ಬತ್ತ್ದ್ ಬೆಂದಿನ ಬೆನ್ನಿ ಕರಾವೆರೆ ಸುರುವಾಂಡ್. ಸಂಕಮ ಏತ್ ಬುದ್ದಿ ಪಂಡ್ಂಡಲಾ ಕೇನಿಜೆರ್. 'ಯಾನ್ ಮಲ್ದಿನಿ - ಯಾನ್ ಮುಗಿಪ್ಪುನಿ, ಕೇನ್ಯರೆ ಈ ಏರ್?' ಪಂದ್ ಗೌಜಿ ಮಲ್ತೆರ್.
ತ್ಯಾಂಪಣ್ಣೆ ಪರ ಎರು ಬದಲ್ತ್ತ್ದ್ ಪೊಸ ಎರುಕ್ಕುಲೆನ್ ಕಟ್ಟಿಯೆರ್. ಕೊಗ್ಗೆ ಅಯ್ತ ಬೆರಿಟ್ಟ್ಲಾ ಸಾರ ಸಾರ ದೂದು ಕಟ್ಟ್ದ್ ಏತ್ ಬೊಬ್ಬೆ ಪಾಡ್ಂಡಲಾ, ಮಂಜೊಟ್ಟಿಡ್ ಉಂತುದು ದೊಂಡೆ ಬಿಚ್ಚುಲೆಕ್ಕ ಎರುಕ್ಕುಲೆನ್ ಲೆತ್ತ್ಂಡಲಾ ವಾ ಪ್ರಯೋಜನಲಾ ಬೂರ್ಜಿ.
ಒಂಜಿ ಸತರ್ಿ ತ್ಯಾಂಪಣ್ಣೆರ್ನ ಎರುಕ್ಕು ಬುದ್ದಿ ಕಲ್ಪಾವೆಂದ್ ಮೂಂಕು ಬಲ್ಲ್ಡ್ ಪತ್ತ್ದ್ ಉರಬಡುಟ್ಟು ರಡ್ಡ್ ಒಯ್ಪುನಗ ಬರಮುಡು ದುಂಬು ಬತ್ತಿನ ಎರು ಕೊಗ್ಗಣ್ಣನ ಬಂಜಿ - ತಿಗಲೆದ ಸಂದ್ಗ್ ಗಟ್ಟಿಡ್ ಎಡ್ತ್ಂಡ್. ಅಲ್ಪನೇ ಮಗ್ರ್ನ ಕೊಗ್ಗಣ್ಣೆ ಒಂಜಿ ರಡ್ಡ್ ಗಳಿಗೆಡೇ ಪ್ರಾಣ ಬುಡಿಯೆರ್.
ಬಂಜಿನಾಲ್ ಸಂಕಮಕ್ಕನ ಇಲ್ಲ್ ಬಿತ್ತ್ಲ್ನ್ ಸಾಲ ಕೊರ್ತಿನಕ್ಲು ಏಲಂ ಮಲ್ತೆರ್. ಮಗೆ ನಾರಾಯಣೆ ಪುಟ್ಟುನಗ ಸಂಕಮ್ಮಡ ಒಂಜಿ ಅಕ್ಕಡ್ದ ಕಡ್ಡಿಲಾ ಇಜ್ಜಾಂದೆ ಪೋಂಡು. ಅಪ್ಪೆ ಇಲ್ಲಡ್ ಪಾಲ್ಗ್ ಬತ್ತಿನ ಒಂಜಿ ಎಲ್ಯ ಇಲ್ಲಡ್ ಸಂಕಮ್ಮ ನಾರಾಯಣನ್ ತಾಂಕಿಯಲ್. ಕೆಯಿ - ನಟ್ಟಿಗ್ ಪೋದು ನಾರಾಯಣಗ್ ದಾಲ ಕಮ್ಮಿ ಆವಂದಿಲೆಕ್ಕ ತೂಯಲ್.
ನಾರಾಯಣೆ ಜವನ್ಯೆ ಆಯೆ. ಅಮ್ಮೆ ಕೊಗ್ಗನ ಬಿಸರ್ಾದಿಗೆ ನಾರಾಯಣಡಲಾ ತೋಜಿದ್ ಬತ್ತ್ಂಡ್ 'ಬೆನ್ಪಾಟದ ಜವನ್ಯೆ'ಂದ್ ಜನಕ್ಕೊಲು ಬೆರಿ ಬೊಟ್ಟಿಯೆರ್. ಸಂಕಮ ಮಗನ್ ಸಂಕ್ರಾಂದಿ - ಸಂಕ್ರಾಂದಿ ದೇವೆರೆನ ಮನೆತ್ತ ಎದುರ್ ಉಂತಾದ್ ಪಟಕ್ಕು ಕೈ ದೀಪಾದ್ 'ಯಾನ್ ಕಂಬುಲೊಗು ಪೋಪುಜಿ... ಪೋಪುಜಿ... ಪೋಪುಜಿ' ಪಂದ್ ಆಜ ಪಾಡ್ಪಾವೊಂದಿತ್ತಲ್. ಅಂಚನೆ ನಾರಾಯಣೆ ಕಂಬುಲದಂಚಿ ತರೆ ಪಾಡ್ದ್ ಜೆತ್ತ್ಜೆ.
ಜವನ್ಯೆ ನಾರಾಯಣಗ್ ಎಡ್ಡ ಗುಣತ್ತ ಪೋಣ್ಣು ಆವೊಡುಂದು ಊರೊರ್ಮೆ ನಾಡ್ದ್ ಬೊಳ್ಮಣ್ದ ಕಾಂತಪ್ಪಣ್ಣನ ಮಗಳ್ ಸೀತನ್ ಮರ್ಮಲಾದ್ ಕನತ್ತೆರ್. ಸಂಕಮ್ಮಕ್ಕಗ್ ಸರಿಯಾಯಿನ ಮರ್ಮಲ್ ಸೀತ ಪಂದ್ ನಿರೆಕರೆತ್ತಕ್ಲು ಮಾತಾ ಪಂಡೆರ್.
ನಾರಾಯಣೆ ಇಲ್ಲಡ್ ಪೊರ್ಲಕಂಟ್ಡ್ ಬಲತಿನ ಮೈಪ ಕೋರಿನ್ ಪತ್ತೊಂದು ಪಡ್ಡೆದ್ರದ ಗಡಂಗ್ದ ಬರಿತ್ತ ಕೋರ್ದಟ್ಟದಂಚಿ ಏಪ ಪೋಯೆನಾ ಆನಿಯೇ ಆಯಗ್ ಸನಿ ಪತ್ತ್ಂಡ್. ಮೈಪಕೋರಿ ಏಲ್ ಕೋರಿಲೆನ್ ಕಾದ್ದ್ ಕೊರ್ನಗ ನಾರಾಯಣಗ್ ಕೋರ್ದಟ್ಟದ ಮರ್ಲ್ ತರೆಕ್ ಏರ್ದ್ ಪೋಂಡು. ಅಲ್ತ್ ಬೊಕ್ಕ ಓಲೋಲು ಮಾತಾ ಕೋರಿಕಟ್ಟ ಆಪುಂಡಾ ಅವುಲುಮಾತಾ ನಾರಾಯಣೆ ಉಪ್ಪೊಡೆ ಪನ್ಪಿನ ಕಾಲ ಬತ್ತ್ಂಡ್. ಸಂಕಮ್ಮ ಏತ್ ಜೋರು ಮಲ್ತ್ಂಡಲಾ 'ಈ ರೊರ ಮನಿಪಂದೆ ಕುಲ್ಲುಲೆ ಅಮ್ಮ. ಕೋರ್ದಟ್ಟದವುಲು ದಾನೆ ಎರು ಬರ್ಪುಂಡಾ ತಾಡ್ಯೆರೆ' ಪಂದ್ ಪನ್ಯೆರೆ ಸುರು ಮಲ್ತೆ.
ಸಂಕಮ್ಮನ ವಾ ಜನ್ಮದ ಪಾಪದ ಫಲನಾ ದಾಂನಾ ಸೀತ ಕಡೀರ್ದ ಬಂಜಿನಾಲ್ ಪೆದ್ದೆರೆಂದ್ ಅಪ್ಪೆ ಇಲ್ಲಗ್ ಪೋತಿನಾಲ್ ಬೊಕ್ಕ ಪಿರ ಬತ್ತ್ಜಲ್. ಶಂಕರಗ್ ಈ ಲೋಕದ ಬೊಲ್ಪು ತೋಜಾಯಿನ ಸೀತ ತೋಜಂದಿನ ಲೋಕೊಗು ಪಿದಾಡ್ದ್ ಪೋಯಲ್. ಪುರ್ಕಟ್ ಬಾಲೆನ್ ಸಂಕಮ್ಮಕ್ಕನೇ ಕನತ್ತ್ದ್ ತಾಂಕಿಯಲ್.
ಒಂಜಿ ಬೈಯ್ಯಗ್ ಕೋರ್ದಟ್ಟಗ್ಂದ್ ಪೋಯಿನ ನಾರಾಯಣೆ ರಾತ್ರಿ ಏತ್ ಪೊತರ್ಾಂಡಲಾ ಇಲ್ಲಗ್ ಬತ್ತ್ಜೆ ಮನದಾನಿ ಪುಲ್ಯಕಾಂಡೆ ಸುದ್ದಿ ಕೇಂದ್ ಸಂಕಮಕ್ಕನ ಅಕಲ್ ಪಾರ್ದೇ ಪೋಂಡು. ನಾರಾಯಣನ ಕೋಲು ಕಾರ್ಗ್ ಬಾಲ್ ತಾಗ್ದ್ ನೆತ್ತೆರ್ ಕಟ್ಟಂದಿನೆಕ್ ಕುಡ್ಲದ ಮಲ್ಲ ಆಸ್ಪತ್ರೆಗ್ ಕೊನನಗ ಸಾದಿಡೇ ನೆತ್ತರ್ ಖಾಲಿ ಆದ್ ಜೀವ ಬುಡಿಯೆಗೆಂದ್ ಊರು ನಿಲ್ಕೆ ಸುದ್ದಿ ಅಂಡ್.
ಅನಾಥೆ ಆಯಿನ ಶಂಕರೆ ಸಂಕಮ್ಮಕ್ಕಗ್ ಬದ್ಕೆರೆ ಬೊಲ್ಪು ಆದ್ ತೋಜಿಯೆ. ಇಂದ ಮಗಾ ನಿನ್ನ ಅಜ್ಜೆ ಕಂಬುಲಗ್ ಪೋದ ಹಾಳಾಯೆರ್, ಅಮ್ಮೆ ಕೋರ್ದಟ್ಟೊಡು ಜೂವ ಬುಡಿಯೆ. ನಿನನ್ ಯಾನ್ ಓಡೆಲಾ ಪೋವೊಚ್ಚಿಂದ್ ಪನ್ಪುಜಿ ನಿನ್ನ ಅಮ್ಮೆ, ಅಜ್ಜೆರ್ ಎಂಚ ಹಾಳಾಯೆರ್ಂದ್ ಮಾತ್ರ ಪನೊಂದುಲ್ಲೆ ಬೊಕ್ಕ ಮಾತಾ ನಿಕ್ಕೇ ಬುಡ್ತಿನವುಂದು ಶಂಕರಗ್ ಬುದ್ದಿ ತೆರೆಯೆರೆ ಸುರುವಾಯಿನಡ್ದಿಂಚಿ ಸಂಕಮಕ್ಕ ಪನೊಂದೇ ಬತ್ತೆರ್.
ಶಂಕರೆ ಶಾಲೆಗ್ ಪೋಯೆರೆ ಸುರ ಮಲ್ತೆ. ಶಾಲೆ ಕಲ್ತ್ದ್ ಎಡ್ಡೆ ಬೇಲೆ ಪತ್ತಿಯೆಡ ಯಾನೊಂಜಿ ವಾ ಎತೆಲಾ ದಾಂತೆ ಪೆರಣ ಬುಡ್ಪೆಂದ್ ಸಂಕಮಕ್ಕ ಎನ್ನಿನಿ ಮಾತ್ರ ಅತ್ತ ನಾಲ್ ಜನೊಕ್ಲುಡೆ ಪೆಂಡೆರ್. ಶಂಕರನ ಮಂಡೆಗ್ ಬರವು ಎಡೇನ ಪತ್ತ್ಂಡ್. ಆಯೆ ಒಂಜನೇ ನಂಬರ್ಡೇ ದುಂಬು ದುಂಬು ಪೋಯೆರೆ ಸುರು ಮಲ್ತೆ.
ಸಂಕಮಕ್ಕಗ್ ಬಾರೀ ಕುಶಿ. ಅರೆಗೆ ಬೆನ್ಯೆರೆ ಬಾರೀ ಉಮೇದ್. ಕೆಯಿ - ನಟ್ಟಿ - ಬೈ -ಮುಳಿಕ್ಕ್ಂದ್ ಪೋನಗ, ಪೇಂಟೆ - ದೇವಸ್ಥಾನ ಮಾತ್ರ ಅತ್ತ್ ಪೋಯಿನಲ್ಪ - ಬತ್ತಿನಲ್ಪ ಮಾತಾ ಕಡೆಟ್ಟ್ಲಾ ಬಾಯಿ ನಿಲ್ಕೆ ಪಾತೆರೊಂದು ನಡು ನಡುಟ್ಟು ಶಂಕರನ್ ಪುಗೊಂದು ಇತ್ತೆರ್.
ಏರಾಂಡಲಾ ಪುಲ್ಲಿ ಓಡೆಪೋತೆ ಪಂದ್ ಸಂಕಮಕ್ಕಡ ಕೇಂಡ ಆರ್ ಬಾಯಿ ನಿಲ್ಕೆ 'ಶಾಲೆಗ್ ಪೋತೆ ಮಗಾ, ಆಯನ ಅಜ್ಜೆ- ಅಮ್ಮೆರ್ ಇಜ್ಜಾಂದಿನ ದುರಾಭ್ಯಾಸೊಡು ಸೈತ್ ಪೋಯೆರ್ ಇಂಬ್ಯೆ ಒರಿಯಾಂಡಲಾ ಒಂತೆ ಕಲ್ಪಡ್ ಮಗಾಂದ್' ಪನೊಂದಿತ್ತೆರ್.
ಐತಾರ್ದಾನಿ ಶಂಕರೆ ಓಡೆ ಪೋತೆಂದ್ ಸಂಕಮಕ್ಕಡ ಕೇನುನೇ ಒಂಜಿ ರಂಗ್. 'ಇನಿ ಆಯಗ್ ರಜೆ ಮಗಾ. ಅವು ದಾದನಾ ಗೊಬ್ಬುವೆರತ್ತಾ. ಒರಿ ಚೆಂಡ್ ದಕ್ಕುನು ಬೊಕ್ಕರಿ ನನೊಂಜಿ ಮಗರ್ಿಲ್ಡ್ ಉಂತುದು ಕೊದಂಟಿ ಪತ್ತ್ದ್ ಬೀಜಾವುನು. ಚೆಂಡ್ ಆಯನ ಪಿರಾವುಡು ಊರ್ದಿನ ಮೂಜಿ ಕೋಲುಗು ತಾಗ್ಂಡ ಆಯೆ ಅವೆಂಚಿನ 'ಓಟು' ಗೆ ಎಂಕ್ ಬರ್ಪುಜಿ ಮಗಾ. ಆಯೆ ಪೋದು ಬೊಕ್ಕೊರಿ ಕೊದಂಟಿ ಪತೊಂದು ಬರ್ಪಿನಿ. ಏತ್ ಪೊಲರ್ು. ಮುರಾನಿ ಪದವುದ ಮೈದಾನೊಡು ಯಾನ್ ತೂಯೆ. ಶಂಕರೆ ಒಂಜಿ ಕೊದಂಟಿ ಪತ್ತೊಂದು ಚೆಂಡ್ಗ್ ಬೀಜಾದ್ ಬೀಜಾದ್ ಆಕೊಂದಿತ್ತೆ. ಬಾರಿ ಸೋಕುದ ಗೊಬ್ಬು ಅವು ಈ ಜೋಕ್ಲೆಗ್ ದೊಂಬು - ತೂ ಪಂದ್ ದಾಲಾ ಇಜ್ಜಿ ಇಲ್ಲಗ್ ಬನ್ನಗ ಮೋನೆಗ್ ಕಾಲೆ ಆಕಿಲೆಕ್ಕ ಆದುಪ್ಪುಂಡು....
ಬೊಕ್ಕ ಐತಾರ ಮಿನಿ ಆಯಗ್ ಒಂಜಿ ಚೂರು ಪುರ್ಸೊತ್ತಿಜ್ಜಿ. ಮುಲ್ಕಿ, ಬೆದ್ರ, ಕಾರ್ಲ ಪಂದ್ ಗೊಬ್ಬೆರೆ ಪೋಪೆ, ಮುರಾನಿ ಒಂಜಿ ಮಲ್ಲ ಮೆಡಲ್ ಕನೈದೆ. ಮಲ್ಲ ಅರಿವಾಣದ ಲೆಕ್ಕ ಇತ್ತಂಡ್. ಅಂಚಿನ ತಾಟುಲು ಇಲ್ಲಡ್ ಮಸ್ತ್ ಉಂಡು. ಗೋಡೆಡ್ ಮಾತಾ ತಿಕ್ಕಾದ್ ದೀತೆ. ಬೊಕ್ಕ ರೆಂಕೆ ಬೈದಿನ ಲೋಟೆಲು ಪತ್ತೈವ ಉಂಡು' ಇಂಚ ಸಂಕಮಕ್ಕ ಒಂಜೇ ದಂಬುಡು ಪನ್ಪಿನೆನ್ ಕೇಂದೇ ಕುಲ್ಲುಗಾಂದ ಆಪುಂಡು.
ಅಂಚಿನ ಸಂಕಮಕ್ಕ ಇತ್ತೆ ಪಾತೆರುನನೇ ಬುಡ್ತೆರ್ ಅಂಚಿನ ದಾನೆ ಆಂಡಪ್ಪಾ ಮೆರೆಗ್.
'ಅವು ದಾಲಾ ಇಜ್ಜಿಗೆ ಮುರಾನಿ ಐತಾರ್ದಾನಿ ಮುಲ್ಕಿಡ್ ಕ್ರಿಕೆಟ್ ಮ್ಯಾಚಿ ಇತ್ತ್ಂಡ್ಗೆ. ಶಂಕರೆ ಆಯನ ಟೀಮು ಗೆಂದುಡುಂದು ಒಂಜಿ ಸಾರ ಪಂತ ಕಟ್ಟ್ದಿತ್ತೆಗೆ. ಅಂಚ ಮೊಕ್ಲು ಗೆಂದಿ ಬೊಕ್ಕ ಶಂಕರಡ ಪಂತ ಪಾಡ್ದಿನಾಯೆ ಕಾಸ್ ಕೊರ್ಜೆಗೆ. ಶಂಕರೆ ಉಂತಾದೀದ್ ಕೇನ್ನಗ 'ಈ ಒರ ಪೋಯಾಂದ್' ಪಂಡೆಗೆ ಅಪಗ ಗಲಾಟೆ, ಪೆಟ್ಟ್ ಸುರವಾಂಡ್ಗೆ. ಆಯೆ ಕೈಟಿತ್ತಿನ ಬ್ಯಾಟ್ಡ್ ಶಂಕರಗ್ ಆಕಿಯೆಗೆ. ಗಲಾಟೆ ಜೋರಾದ್ ಅಕುಲು ಶಂಕರನ ಕಣ್ಣ - ಕೈ -ಕಾರ್ ತೂವಂದೆ ಆಕ್ದ್ ಪಾಡ್ದೆರ್ಗೆ. ಶಂಕರನ ಕಾರ್ ಪೊಲಿದ್ ಆಯನ್ ಆಸ್ಪತ್ರೆಡ್ ಪಾಡ್ದೆರ್ಗೆ. ನನ ಶಂಕರೆ ಸರಿ ಕಟ್ಟ್ ನಡಪೊಡ್ಡ ಕಮ್ಮಿಡ್ ಕಮ್ಮ ಆಜಿ ತಿಂಗೊಲು ಬೋಡಾವುಗೆ. ಪಾಪ ಸಂಕಮಕ್ಕ. ಅರೆನ ಕಂಡನೆ ಎರು ತಾಡ್ದ್ ಸೈದೆರ್. ಮಗೆ ಕೊರ್ದಟ್ಟಡ್ ಸೈತೆರ್. ಪುಲ್ಲಿ ಶಂಕರೆ ಇತ್ತೆ ಮ್ಯಾಚಿಡ್ ಪಂತ ಪಾಡ್ದ್ ಪೆಟ್ಟ್ ಗಲಾಟೆ ಮಲ್ತ್ದ್ ಕಾರ್ ಪೊಲಿದ್ ಆಸ್ಪತ್ರೆಡ್ ಜೈದೆ. ಬೊಕ್ಕ ಸಂಕಮಕ್ಕ ಇತ್ತೆ ದುಂಬುದಲೆಕ್ಕ ಪಾತೆರುನಾಂಡಲಾ ಎಂಚ ಪನ್ಲೆ.