ಚರ್ಮುರಿ ಚಿನ್ನೆ

ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿಯ ತುಳು ಕಥಾ ಸ್ಫರ್ಧೆಯಲ್ಲಿ ದ್ವಿತೀಯ ಬಹುಮಾನ ಪಡೆದ ಕಥೆ

ಚರ್ಮುರಿ ಚಿನ್ನೆ
'ಚರ್ಮುರಿ ಚಿನ್ನಪ್ಪಣ್ಣನ ಬೇರ ಇನಿ ಅಕೇರಿಗೆ, ಇನಿ ಆರ್ನ ಚರ್ಮುರಿ ಅರ್ಧಕ್ರಯೋಗು ಕೊರೊಂದುಲ್ಲೆರ್ಗೆ'
ಈ ಸುದ್ಧಿ ಆಟದವುಲು ಸೇರ್ದಿನ ಮಾತಾ ಜನಕ್ಲೊನ ಕೆಬಿತ್ತುಲಾಯಿ ನೂರುದು. ಅಕ್ಲೆನ ಕಣ್ಣ್ದ ಕುರ್ಬು ವಿಚಿತ್ರೊಡು ಮಿತ್ತ್ ಏರುಂಡು. ಮಾತೆರ್ಲಾ ಚಿನ್ನಪ್ಪಣ್ಣನ ಚರುಮುರಿತ್ತ ಅಂಗಡಿದಂಚಿ ಇಚಿತ್ರೊಡು ತೂಪೆರ್. 'ಮೆರೆಗ್ ದಾಯಗ್ ನನಲಾ ಈ ಚರುಮುರಿತ್ತ ಬೇರ. ಮಗೆ ಅಮೆರಿಕೊಡ್ದು ಕಡಪುಡಿನ ದುಡ್ಡು ಯಾವುಜಾಂದ್ ಕೆಲವೆರ್ ಅಕಲ್ನಾತಿಗೆ ಎನ್ನಿಯೊನ್ನಿ ಮಾತ್ರ ಅತ್ತ್ ಬೊಕ್ಕೊರಿಯಡಲಾ ಪಂಡೆರ್. ಚಿನ್ನಪ್ಪಣ್ಣೆ ಮಾತ್ರ ವಾ ಎತೆಲಾ ಇಜ್ಜಾಂದಿಲೆಕ್ಕ ಚರ್ಮುರಿ ತಿರ್ಗಾವೊಂದಿತ್ತೆರ್.
*****
ಮುರಾನಿ ಮುರಾನಿಮುಟ್ಟ ಚರುಮುರಿ ಚಿನ್ನೆ ಆದಿತ್ತಿನ ಕುರ್ಲರಿ ಕುಂಞಪ್ಪನ ಮಗೆ ಇಂಚೊಗು ಚರುಮುರಿ ಚಿನ್ನಪ್ಪಣ್ಣೆ ಆದ್ ಬದಲಾತೆರ್. ಚಿನ್ನೆ, ಚಿನ್ನಪ್ಪಣ್ಣೆ ಆದ ಬದಲಾವೊಡ್ಡ ಆರ್ ಸಂಪಾದನೆ ಮಲ್ದಿನ ದುಡ್ಡು ಕಾರಣ ಅತ್ತ್, ಆಟ ನೇಮ, ಅಂಕ ಆಯನದವುಲು ಒಂಜಿ ಎಲ್ಯ ಮೇಜಿ ದೀದ್ ಅಯ್ತ ಮೂಲೆಡ್ ಗ್ಯಾಸ್ ಲಯಿಟ್ ಕುಲ್ಲಾದ್, ಎಲಿಮಿನ್ದ ತೋಪುಗು ಒಂತೆ ತಾರಾಯಿದೆಣ್ಣೆ ಪಾಡ್ದ್ ಅಯಿಕ್ ಉಪ್ಪು, ಮುಂಚಿದ ಪೊಡಿ ಮಾತ ಸೇರಾದ್, ಒಂಜಿ ಎಲ್ಯ ಪುಂಡಿ ನೆಲಕಡಲೆ ಪಾಡ್ದ್, ಕಟ..ಕಟ...ಕಟ ಪಂದ್ ಶಬ್ದ ಮಲ್ತ್ದ್ ಕೊಚ್ಚಿದಿನ ನೀರುಳ್ಳಿನ್ ಬೆರಸಾದ್ 'ನಿಕ್ಲೆಗ್ ಏತ್ ಕೊರೊಡನ್ನಾ ಚರ್ಮುರಿ' ಪಂದ್ ತೊಟ್ಟೆದುಲಾಯಿ ಇತ್ತಿನ ಚರ್ಮುರಿನ್ ಕಿನ್ಯ ಪಾವುಡು ಲೆಕ್ಕ ಮಲ್ತ್ ಪಾಡ್ದ್ ಗಸ...ಗಸಾಂದ್ ಬಿರಾದ್ ಆಕೇರಿಗ್ ಜನಕ್ಲೊನೆ ಗೋಚರೊಗ್ಲಾ ಆಂಡ್, ಕೈಲ್ಡ್ ಪತ್ತ್ದಿನ ಚಮರ್ುರಿ ತಾಲೆರ್ಲಾ ಆಂಡ್ಂದ್ ಟನ, ಟನ, ಟನ, ಟನ ಪಂದ್ ನಾಲ್ ಸರ್ತಿ ತೋಪುಗು ಬೊಟ್ಟುದು 'ಚರ್ಮುರಿ .... ಚರ್ಮುರಿ ....ಂದ್ ಬೊಬ್ಬೆ ಪಾಡ್ದ್ ಕಾಕಜಿದ ತೊಟ್ಟೆದುಲಾಯಿ ಚರುಮುರಿನ್ ಅಮಸರೊಡು ದಿಂಜಾದ್ ಗಿರಾಕಿಲೆಗ್ ಕೊರ್ದು ಅಕಲು ಕೊರ್ನ ನಾಲ್ - ಐನ್ ರೂಪಾಯಿನ್ ಎಲ್ಯ ಪೆಟಿಗೆದುಲಾಯಿ ಪಾಡಿನ ದುಡ್ಡುದ ಸಂಪಾದನೆಡ್ದ್ ಚಿನ್ನೆ ಚಿನ್ನಪ್ಪಣ್ಣೆ ಆತಿನಿ ಅತ್ತ್.
ಚಿನ್ನನ ಅಮ್ಮೆ ಕುಂಞಪ್ಪೆ ಕುರ್ಲರಿತ್ತ ಬೇರ ಏಪ ಸುರು ಮಲ್ದೆರ್ ಪಂದ್ ಏರೆಗ್ಲಾ ಗೊತ್ತುಜ್ಜಿ. ಜನಕ್ಲೆನ ಬಾಯಿಡ್ ಕುರ್ಲರಿ ಕುಂಞಪ್ಪನ ಪುದರ್ ಮಾತ್ರ ನಲ್ತೊಂದಿತ್ತ್ಂಡ್. ಚಿನ್ನೆ ಎಲ್ಯೊಡ್ದಿಂಚಿ ಪಂಡ ಆಯಗ್ ಬುದ್ದಿ ತೆರಿನೆಡ್ದಿಂಚಿ ಕುಂಞಪ್ಪನೊಟ್ಟುಗು ಆಟ, ಅಂಕ, ಆಯನದವುಲು ಹಾಜಿರಾವೊಂದಿತ್ತೆ. ಸುರುಸುರುಕ್ಕು ಗೋಣಿಡ್ ಇತ್ತಿನ ಕುರ್ಲರಿನ್ ಸೇರ್ಡ್ ಲತ್ತ್ದ್ ಅಂಜೊವುಲೆನ ಬೈರಾಸ್ಗ್, ಪೊಂಜೊವುಲೆನ ಸೆರಂಗ್ಗ್ ದೊರ್ತೊಂದುತ್ತಿನ ಕುಂಞಪ್ಪಗ್ ಬೊಕ್ಕ ಬೊಕ್ಕ ಕಾಕಜಿನ್ ಸುರ್ಲಿ ಸುತ್ತುದ್ ಅಯ್ತ ಮುದೆಲ್ನ್ ತಿಗರ್ಾದ್ ತಿಕ್ಕಾದಿನ ತೊಟ್ಟೆಲೆನ್ ಮಲ್ತ್ ಕೊಪರ್ಿನ ಸಾಯ ಮಲ್ತೊಂದಿತ್ತೆ. ಇಂಚ ಮಲ್ತಿನ ತೊಟ್ಟೆಲೆನ್ ಒಂಜೆತ್ತ ಉಲಾಯಿ ಒಂಜಿ ಪಾಡ್ದ್ ಅಟ್ಟಿ ಮಲ್ಪುನ, ಒಂಜೊಂಜೇ ತೊಟ್ಟೆಲೆಡ್ ಕುರ್ಲರಿ ಜಿಂಜಾದ್ ಕುರ್ಲರಿತ್ತ ಗೋಣಿದ ತರೆಕ್ಕ್ ಕಂತಾದ್ ದೀದ್ ಅಯಿತ್ತ ಪೊರ್ಲು ತೂಪಿನವು ಚಿನ್ನಗ್ ಬಾರೀ ಕುಸಿ ಕೊರೊಂದಿತ್ತ್ಂಡ್.
ಚಿನ್ನೆ ಅಪ್ಪೆ ಮೋನೆನ್ ತೂತಿನಾಯೆ ಅತ್ತ್. ಕುಂಞಪ್ಪೆ ಮೂಂಕು ಮುಟ್ಟ ಪದರ್್ ಬತ್ತ್ದ್ ಆಯನ ಬೊಡೆದಿಗ್ ಪಂಡ ಚಿನ್ನನ ಅಪ್ಪೆಗ್ ನೋತೊಂದಿತ್ತೆಗೆ. ಅಂಚ ಒಂಜಿ ಪುಲ್ಯಕಾಂಡೆ ಚಿನ್ನನ ಅಪ್ಪೆ, ಚಿನ್ನೆ ನನಲಾ ಎಲ್ಯ ಬಾಲೆ ಆದುಪ್ಪುನಗನೇ ಇಲ್ಲದುಲಾಯೇ ಜೆಯಿದಿನ ಪಜೆಟ್ಟೇ ಮರಕಟ್ಟ್ದ್ ಪೋದಿತ್ತಲ್ಗೆ. ಅವು ಆಲ್ ಸೀಕ್ಡ್ ಸೈದಿನಿ ಅತ್ತ್ ಕುಂಞಪ್ಪೆ ಆಕ್ದಿನ ಪೆಟ್ಟ್ ಆಯಕಟ್ಟ್ದ ಜಾಗಗ್ ಬೂರ್ದಿನಿಂದ್ ಏರಾ ಪನ್ಪಿನೆನ್ ಚಿನ್ನೆ ಬುದ್ದಿ ತೆರಿಬೊಕ್ಕ ಕೇಂದಿತ್ತೆ. ಅಯಿಡ್ದ್ ಬೊಕ್ಕ ಚಿನ್ನಗ್ ಅಪ್ಪೆಲಾ ಕುಂಞಪ್ಪನೇ, ಅಮ್ಮೆಲಾ ಕುಂಞಪ್ಪೆನೇ. ಚಿನ್ನನ ಅಪ್ಪೆ ತೀರಿ ಬೊಕ್ಕ ಕುಂಞಪ್ಪೆ ಕಲಿ ಗಂಗಸರ ಮುಟ್ಟುದಿನೇ ಇಜ್ಜಿ. ಚಿನ್ನನ್ ಅಯಿತ್ತಂಚಿ ಸುಳಿಯೆರಂದಿಲೆಕ್ಕ ಪಾರದ ಪೆರಡೆ ತೆತ್ತಿಲೆನ್ ಕಾದೊಂದಿಲೆಕ್ಕೊನೇ ಕಾತ್ದಿತ್ತೆ.
ಚಿನ್ನೆ ಸಾಲೆದ ಮುಟ್ಟು ತೊತರ್ುದಿನಾಯೆ ಅತ್ತ್. ರಾತ್ರೆ ಇಡೀ ಆಟ, ಅಂಕ, ಆಯನದವ್ಲು ನಿದ್ರೆ ಕಜ್ಜೆರ್ದ್ ಮನದಾನಿ ಕಾಂಡೆ, ಊರುದ ಜೋಕ್ಲು ಮಾತಾ ಸಾಲೆಗ್ ಪೋಪಿನ ಪೊತರ್ುಡು ಇಂಬ್ಯೆಗ್ ಗೌಜಿದ ನಿದ್ರೆ. ಕುಂಞಪ್ಪಗ್ಲಾ ಚಿನ್ನನ್ ಸಾಲೆಗ್ ಕಡಪುಡೊಡುಂದು ತೋಜಿನನೇ ಇಜ್ಜಿ. ಒಟ್ರಾಸಿ ಕುರ್ಲರಿತ್ತ ಬೇರ ಮಲ್ಪೆರೆ ಕಲ್ತೆಡ ಯಾವು ಪಂದ್ ಆಯೆ ಬಾಕಿದಕ್ಲೆಡ ಮಾತಾ ಪನೊಂದಿತ್ತೆ. ಅಂಚಾದ್ ಕುರ್ಲರಿತ್ತ ಬೇರ ಬೇಜಾರ್ ಪಂದ್ ಚಿನ್ನಗ್ ತೋಜಿದಿನ್ಲಾ ಇಜ್ಜಿ. ದಾಯೆ ಪಂಡ ಕುರ್ಲರಿತ ಬೇರ ಮಾತ್ರ ಅತ್ತ್ ಒಟ್ಟುಗು ಆಟ, ನೇಮ ತೂಯಿಲೆಕ್ಕಲಾ ಆಪುಜಾ?. ವಾ ಮೇಳದ ಭಾಗಂತೆರ್ ಎಂಚಸೊರ ದೆಪ್ಪುವೆರ್. ಏತ್ ಪೊತರ್ುಗು ವಾ ಪದ ಪನ್ಪೆರ್ ಪನ್ಪಿನವು ಚಿನ್ನೆ ಎಲ್ಲಿ ಪ್ರಾಯೊಡೇ ಕಲ್ತ್ದೆ. ಕೃಷ್ಣ ಲೀಲೆ ಆಟೊಡು ಮಾಯಾ ಪೂತನಿ ಬನ್ನಗ ಯಶೋದೆ ಬಾಲಕೃಷ್ಣದೇವೆರೆನ್ ಪತ್ತೊಂದು ಮಾನಾವುನ ಪದೊಕ್ಕುಲು ಎಲ್ಯ ಪ್ರಾಯೊಡು ಚಿನ್ನಗ್ ಬಾರಿ ಇಷ್ಟೊದವು. ಒರೊರ ಪಗೆಲ್ಡ್ ಒರಿಯೇ ಕುಲ್ಲೊಂದು ಆಯೆ ಕಣ್ಣ್ಡ್ ತೂವಂದಿನ ತೀರ್ ಪೋತಿನ ಆಯನ ಅಪ್ಪೆನ್ ಎನ್ನಿಯೊಂದು ಪದ ಪನೊಂದು ಕಣನೀರ್ ಜಪುಡಾವೊಂದಿತ್ತೆ.
ಅಮ್ಮೆ ಮಗನ ಕುಲರ್ುದ ಬೇರ ಪೊಲರ್ುಡು ನಡತೊಂದಿತ್ತ್ಂಡ್. ಅಂಚಾಂದ್ ಕುಂಞಪ್ಪೆ ಖಾಲಿ ಕುರ್ಲರಿತ್ತ ಬೇರದಾಯೆ ಮಾತ್ರ ಅತ್ತ್. ಆಯಗ್ ಮದರ್್ ಕೊರಿಯೆರ್ಲಾ ಗೊತ್ತಿತ್ತ್ಂಡ್. ಆಯೆರೆದ ಸೋಂಪಣ್ಣನ ಕಾರ್ ಗ್ ಇಸತ್ತ ಮುಳ್ಳು ಕಂತ್ದ್ ಕಾರ್ ಕುರಿಯೊಂದು ಬನ್ನಗ ಅವೆನ್ ತೂಯಿನ ಪಂಡಿತೆರ್ನಕ್ಲು ಬೊಕ್ಕ ಕುಡ್ಲದ ಪೇಂಟೆದ ಸರ್ಕಾರಿ ಆಸ್ಪತ್ರೆದ ಮಲ್ಲ ಮಲ್ಲ ದಾಕ್ದಾರ್ನಕ್ಲು ನನ ಕಾರ್ನ್ ಮೊರಂಪುಡ್ದು ತಿತರ್ತ್ ಕಡ್ಪೊಡುಂದು ಪನ್ನಗ, `ದಾಯೆ ಕಡ್ಪೊಡು? ಯಾನ್ ಸರಿ ಮಲ್ಪುವೆ ಎಂಕ್ ಪತ್ತ್ ದಿನತ್ತ ಪೊರ್ಸೊತ್ತು ಕೊರ್ಲೆ , ಅಯಿಡ್ದ್ ಬೊಕ್ಕ ಬೋಡ್ಡ ಕಡ್ಪುಲೆ` ಪಂದ್ ಪಂಡಿನ ಕುಂಞಪ್ಪೆ ಅವೊಯಿತನಾ ತಪ್ಪುದ ಕಯಿಪೆ ಕಸಾಯೊನು ಸೋಂಪ್ಪಣ್ಣಗ್ ದಿನೊಕ್ಕು ಮೂಜಿ ಸರ್ತಿ ಪರ್ಪಾದ್, ಕಾರ್ಗ್ ತಪ್ಪುದ ಲೇಪ ಪಾಡಿಯೆ. ದಿನ ಪೋಯಿಲೆಕ್ಕೊನೆ ಕಂಚಿದ ಬಾಜನೊಗು ಪತ್ತ್ದಿನ ಕಲೆಂಗಿ ಪೋಯಿಲೆಕ್ಕೊನೇ ಸೋಂಪಣ್ಣನ ಕಾರ್ದ ಪುಡಿಕ್ಕುಲು ಪೂರಾ ಮಾಯ ಆಯೆರೆ ಸುರುವಾಂಡ್. ಸೋಂಪಣ್ಣೆ ದುಂಬುದ ಲೆಕ್ಕನೊ ನಡಪ್ಯೆರೆ ಸುರು ಮಲ್ತೆರ್. ಆರ್ ಕೊರಿನ ವಾ ಇನಾಮುನುಲಾ ಕುಂಞಪ್ಪೆ ದೆತೊನಂದೆ ಮಾತೆರೆಡ ದೆತೊನಿಲೆಕ್ಕೊನೇ `ಎನ್ನ ಐನ್ ಪನವು ಕೊರ್ಲೆ ` ಪಂದ್ ಕೇಂದ್ ಗೆತ್ತೊಂದಿತ್ತೆ.
ಆ ವರ್ಸದ ಆಟಿ ತಿಂಗೊಲ್ದ ಭಾರೀಮಲ್ಲ ಗಾಳಿ ಬಸರ್ೊಡು ಕುಂಞಪ್ಪನ ಇಲ್ಲಗ್ ಪೆಲತ್ತ ಗೆಲ್ಲ್ ಬೂರ್ದು ಮಾಡ್ ನುರಿದ್ ಪುಲ್ಯ ಆವೊಡಾಂಡ ಇಲ್ಲದ ಮಣ್ಣ್ದ ಗೋಡೆ ಬೊದುಲ್ದು ಜರಿದ್ ನೆಲಪತ್ತ್ದ್ ಪೋಂಡು. ಕುಂಞಪ್ಪೆ ತರೆಕ್ಕ್ ಕೈ ದೀದ್ ಕುಲ್ಲುನಗ ಸೋಂಪಣ್ಣೆ ಆಯನ ಕೈಟ್ ಪತ್ತ್ದ್ ದೆರ್ತ್ದದ್ ಅರೆನ ಇಲ್ಲಗ್ ಲೆತ್ತೊಂದು ಪೊಯೆರ್. ಮಗರ್ನ ಪಗ್ಗು ಪದಿನೆನ್ಮ ಪೋಪಿನೆಡ್ದ್ ದುಂಬೇ ಚಾವಡಿ, ಅಡ್ಪಿಲ್, ಬೊಕ್ಕ ಒಂಜಿ ಕೋಣೆದ ಇಲ್ಲ ಕಟ್ಟಾದ್ ಅಯಿತ್ತ ಸುತ್ತ ಅರ್ಧ ಎಕ್ರೆ ಜಾಗೊಗು ಬೇಲಿ ಪಾಡ್ಪಾದ್ ಕುಂಞಪ್ಪನ್ ಕುಲ್ಲಾಯೆರ್. ಕುಂಞಪ್ಪಗ್ ಆಧಾರಲಾ ಆಂಡ್, ಸೋಂಪಣ್ಣನ ಕಾರ್ ಒರಿಪಾದಿನ ಋಣೊನು ಸಂದಾಯಿಲೆಕ್ಕಲಾ ಆದ್ ಪೋಂಡು.
ಸೋಂಪಣ್ಣಗ್ ಐನ್ ಆನ್ ಜೋಕ್ಲು. ಮಲ್ಲ ಮಗೆ ಪನಾಂದೆ, ಕೇನಂದೆ ಬೊಂಬಾಯಿಗ್ ಬಲ್ತ್ದ್ ಅಲ್ಪ ಮುಲ್ಪ ಕೊಪಸ್ ದೆಕ್ಕ್ದ್, ತಿಂಡಿ ಕೈತ್ದ್ ಎಡೇನ ಬೆಂದ್ದ್ ಒಂಜಿ ಹೊಟೆಲ್ ಮಲ್ತೆ. ರಡ್ಡನೇ ಮಗೆಲಾ ಬೊಂಬಾಯಿಗೇ ಬಲ್ತೆ. ನಡುವನೆ ರಾಮಯೆ ಮಾತ್ರ ಊರುಡೇ ಕುಲ್ಲುದ್ ಬೆನ್ನಿದ ಬೇಲೆಡ್ ಸೋಂಪನ್ನಗ್ ಸಾಯ ಮಲ್ಪೆರೆ ಸುರು ಮಲ್ತೆ. ಬೊಕ್ಕ ರಡ್ಡ್ ಜೋಕುಲು ಸಾಲೆ - ಬರವು ಕಲ್ತ್ದ್ ಅಕಲ್ನಕ್ಲೆನ ತಿಕನ ನಾಡೊಂದು ಒರಿ ಡೆಲ್ಲಿಗ್, ಬೊಕ್ಕೊರಿ ಬೆಂಗ್ಳೂರುಗ್ ಪೋಯೆರ್.
ರಾಮಯೆ ಬೊಕ್ಕ ಚಿನ್ನಗ್ ಬಾರೀ ದೋಸ್ತಿ ಕತೆ. `ಅಮ್ಮೆರೆನ ಕಾರ್ ಒರಿತಿನಾಯನ ಮಗೆ` ಪಂದ್ ರಾಮಯಗ್ ಮೋಕೆ. `ಎಂಕ್ಲೆಗೊಂಜಿ ಇಲ್ಲ್, ಜಾಗೆ ಕೊತರ್ಿನಾರ್ನ ಮಗೆ` ಪಂದ್ ಚಿನ್ನಗ್ ರಾಮಯ್ಯನ ಮಿತ್ತ್ ಮಯರ್ಾದಿ. ಪುರುಸೊತ್ತುಡು ಕಿನ್ಯ ಬಟ್ಟಲ್ಗ್ ಮುರ್ನಲ್ದ ಕಡೆಟ್ಟ್ ಬೊಟ್ಟುದು ಆಟದ ಪದಕ್ಲೆನ್ ರಾಮಯ್ಯನೆದುರು ಪಂಡ್ದ್ ಆಯಡ ಅರ್ಥ ಪನ್ಪಾದ್ ಇವರ್ರ್ಲಾ ಪೊರ್ತ್ ಗಿಡತೊಂದಿತ್ತೆರ್.
ಕಾಲದ ಮಯಿಮೆ ಸೋಂಪಣ್ಣೆ ಮಗ್ರ್ಯೆರ್, ಕುಂಞಪ್ಪೆಲಾ ದೇವೆರೆ ಪಾದ ಸೇರ್ಯೆ. ಇತ್ತೆ ರಾಮಯ್ಯನ ಬೆನ್ನಿದ ಕಾರ್ಬಾರ್, ಚಿನ್ನನ ಕುರ್ಲರಿತ್ತ ಬೇರ. ಇವರ್ವೆರೆಗ್ಲಾ ಮದ್ಮೆ ಮಸಿರಿ ಆಂಡ್. ಚಿನ್ನನ ಕೈ ಪತ್ತ್ ಬತ್ತಿನಾಲ್ ಲಚುಮಿ. ಬಾರೀ ಉಸಾರ್ದ ಪೊಣ್ಣು. ರಡ್ಡ್ ಎಡ್ಡೆ ಜಾತಿದ ಪೆತ್ತ ಕಟ್ಟ್ದ್ ಪೇಂಟೆಡ್ ಪೇರ್, ನೆಯಿ ಮಾರ್ದ್ ಇಲ್ಲದ ಖರ್ಚಿಗ್ ವಾ ಕುಂದುಲಾ ಬರಂದಿಲೆಕ್ಕ ತೂವೊಂಡಲ್. ಒಕ್ಕೆಲ್ದಕ್ಲೆಗ್ ಭೂಮಿ ಪನ್ನಿನ ಕಾನೂನು ಬನ್ನಗ ಖಾಲಿ ಕಾಕಜಿಡ್ ದಸ್ಕತ್ ದೆತೊಂದು ಒಕ್ಕೆಲ್ದಕ್ಲೆನ್ ಮಾತಾ ರಾಮಣ್ಣೆ ಗಡಿಪಾರ್ ಮಲ್ತೆಡಲಾ ಚಿನ್ನನ ಖಾಲಿ ಕಾಕಜಿಡ್ ಆಯನ ಅರ್ಧ ಎಕ್ರೆ ಜಾಗೆನ್ಲಾ, ಇಲ್ಲೊನ್ಲಾ ಚಿನ್ನನ ಪುದರ್ಗೇ ಬರೆದ್ ಕೊರ್ದು ಬುಡಿಯೆ.
ಅಮ್ಮೆ ಕುಂಞಪ್ಪೆ ಕೊರ್ತಿನ ಕುರ್ಲರಿತ್ತ ಬೇರ ಕಾಲ ಪೋಯಿಲೆಕ್ಕೊನೆ ಕುರ್ಲರಿ ತಿನ್ಪಿನಕ್ಲು ಕಡಿಮೆ ಆದ್ ಬುರುಸ್ ಆನಗ ಚಿನ್ನೆ ಪೊಸ ಸಾದಿ ನಾಡಿಯೆ. ಕುರ್ಲರಿತ್ತ ಬೇರೊನು ಒಂತೆ ಸುದಾರ್ತದ್ ಕುರ್ಲರಿಕ್ಕ್ ನೀರುಳ್ಳಿ, ಮುಂಚಿದ ಪೊಡಿ, ಕಡ್ಲೆ, ಟೊಮೆಟ ಬೊಕ್ಕ ಮಾತ ಕೆಲವು ತರ್ಕಾರಿ ಸೊತ್ತುಲೆನ್ ಪಾಡ್ದ್ ಎಣ್ಣೆ ಪಾಡ್ದ್ ಬಿರಾದ್ ಚರ್ಮುರಿ... ಚರ್ಮುರೀ...' ಪಂದ್ ಕೊರ್ನಗ ಜನೊಕ್ಲೆಗ್ ಪೊಸ ರುಚಿ ತಿಕ್ಕ್ದ್ ಬಾರೀ ಕುಶಿ ಆಂಡ್. ಅಮ್ಮೆ ಕುರ್ಲರಿ ಕುಂಞಪ್ಪೆ ಪಂದ್ ಪುದಾರ್ ಪೋದುದಿತ್ತ್ಂಡ ಮಗೆ ಚಿನ್ನಗ್ ಚರ್ಮುರಿ ಚಿನ್ನೆಂದ್ ಪುದರ್ ಬತ್ತ್ಂಡ್.
ಚಿನ್ನಗ್ ಆಟದಕ್ಲೆನ, ನೇಮ ಕಟ್ಟುನಕ್ಲೆನ ಮಾತಾ ಎಡ್ಡೆ ಪೊಲಬು ಆಂಡ್. ವಾ ಭೂತದ ನೇಮ ಬೊಕ್ಕ ವಾ ಮೇಳದ ಆಟೊನು ಎಂಚ ಸುದಾಪರ್ೊಡು ಪನ್ಪಿನ ಅನುಭವ ಬತ್ತ್ಂಡ್. ಆಟೊಗು ವಾ ದಿನ ಒಂಚಿ ಮೋನೆ ಪಾಡ್ದ್ ರಂಗಸ್ಥಳ ಪಾಡೊಡು, ವಾ ಆಟೋಗು ವಾ ನಮುನೆದೆ ಸೊತ್ತುಲು ಬೋಡು. ಆಟದ ಕಂಡೊನು ಎಂಚ ಪೊಲರ್ು ಮಲ್ಪೊಡು. ಏಸಕದಕ್ಲೆನ್, ಭಾಗಂತೆರೆನ್, ಪೂಜೆ ಬಟ್ರೆನ್ ವಾ ನಮುನೆಡ್ ಸುದಾಪರ್ೊಡು, ದೇವಿಮಾತ್ಮೆದ ಉಳ್ಳಾಲ್ದಿಕುಲ್ಲುನ ತೊಟಿಲ್ನ್ ಪೊಲರ್ು ಮಲ್ಪೆರೆ ಏತ್ ಪೂ ಬೋಡು, ಮೈಸಾಸುರೆ ಒಲ್ಪೊಡ್ದು ಪಿದಾಡೊಡು, ಅಯಿಕ್ಕ್ ಬೊಡಾಯಿನ ಸೊತ್ತುಲು ಒವು ಉಂದೆನ್ ಮಾತಾ ತೆರಿದ್ ಜನೊಕ್ಲೆಗ್ ಬೊಡಾಯಿನ ಜನ ಆಯೆ. ಆ ಪಸಂತ್ರೊಡು ವಾ ಆಟ, ಅಂಕ , ಆಯನ ಆಪುಂಡಲಾ ಅವೆನ್ ಮಲ್ಪಾವುನಕ್ಲು ಸುರೂಕ್ಕು ಚಿನ್ನನ ಕೈತಡೇ ಬರೊಂದಿತ್ತೆರ್. ಇಂದೆಕ್ಕ್ ಮಾತ ಒಂಜಿ ನಯಾ ಪೈಸ ದೆತೊನಂದೆ ಸಾಯ ಮಲ್ತೊಂದಿನ ಚಿನ್ನಗ್ ಜನಕ್ಲು ಮಾತಾ ವಾ ಕೆಲಸೊಗ್ಲಾ 'ಚಿನ್ನಪ್ಪಣ್ಣ ಈರ್ ಬರೊಡು, ಬತ್ತ್ದ್ ಸುದಾತರ್್ ಕೊರೊಡು' ಪಂದ್ ಸುರೂಕ್ಕು ಬತ್ತ್ ಪನೊಂದಿತ್ತೆರ್. ಇಂಚ ದಿನಪೋಯಿಲೆಕ್ಕನೇ ಚಿನ್ನಪ್ಪಣ್ಣೆ ಆಯಿನ ಚಿನ್ನೆ ಆಟ, ನೇಮ ಸುರುವಾಯಿಲೆಕ್ಕೊನೇ ಬೇತೆ ವಾ ಗೇನಲಾ ದಾಂತೆ ಚಮರ್ುರಿತ್ತ ಬೇರೊಡೆ ಮುಕರ್ುದು ಪೋವೊಂದಿತ್ತೆ.
ಇಂಚಿತ್ತಿನ ಚಮರ್ುರಿ ಚಿನ್ನಪ್ಪಣ್ಣೆ ಇನಿಕ್ಕೇ ಬೇರ ಕೈದ್ ಮಲ್ಪುವೆರ್ಗೆಂದ್ ಪನ್ನಗ ಏರೆಗಾಂಡಲಾ ಇಚಿತ್ರ ಆವಂದೆ ಕುಲ್ಲುವಾ. ಮಾತೆರ್ಲಾ ದಾನೆಗೆ... ದಾನೆಗೆ ಪಂದ್ ಇಚಾರ ಮಲ್ತೊಂದಿತ್ತೆರ್. 'ಆರ್ ಅಮೆರಿಕದ ಆರ್ನ ಮಗನ ಕೈತಡೆ ಪೋಪೆರ್ಗೆ'ಂದ್ ಕೆಲವು ಜವನ್ಯೆರ್ ಮಕ್ಕಾರ್ ಪಾತೆರ್ಯೆರ್. ಚಿನ್ನಪ್ಪಣ್ಣೆ ಮಾತ್ರ ವಾ ಎತೆಲಾ ಇಜ್ಜಾಂದಿಲೊಕ್ಕೊನೇ ಚಮರ್ುರಿ ಮಲ್ತೊಂದಿತ್ತೆ.
ಆಂಡ...
ಚಿನ್ನಪ್ಪನ ಮನಸ್ ಮಾತ್ರ ಬೇಸ ತಿಂಗೊಲುಡು ಬಾಕ್ಯಾರ್ ಕಂಡೊಡು ದೀತಿನ ತೂಂಟಾನ್ದ ಲೆಕ್ಕೊನೇ ಪೊತ್ತೊಂದಿತ್ತ್ಂಡ್. ಊರುಡು ಎಡ್ಡೆ ಸ್ಥಾನ ಮಾನ ಕೊರ್ದು ಎನನೊಂಜಿ ಜನಾಂದ್ ಮಲ್ತಿನ ಈ ಚಮರ್ುರಿತ್ತ ಬೇರ ಬುಡ್ದು ನನ ಯಾನ್ ಬದ್ಕೆರೆ ಉಂಡಾ...? ನನ ಯಾನ್ ದಾದ ಮಲ್ಪೊಡು?. ಉಂದೆಕ್ ಮಾತಾ ಕಾರಣ ಏರ್?. ಎನ್ನ ಮನಸ್ಸ್ಗೆ ತೂ ದೀದ್ ರಾಳದ ಪೊಡಿ ದಕ್ಕ್ದ್ ಧಗ ಧಗ ಪೊತ್ತೆರೆ ಕಾರಣ ಆಯಿನಾಯೆ ಏರ್?, ಎಂಕ್ ನಂಬ್ಯೆರೆನೇ ಆಪುಜಿ. ಬೇತೆ ಏರೆಡ ಪಂಡಲಾ ಅಕುಲು ನಂಬಯೆರ್. ಯಾನ್ ಮೋಕೆಡ್ ತಾಂಕ್ದ್ ಮಲ್ಲ ಮಲ್ತ್ದ್, ಏರೇರ್ನ ಕೈ- ಕಾರ್ ಪತ್ತ್ದ್ ದುಡ್ಡು, ಪಣವು ಒಟ್ಟು ಮಲ್ತ್ದ್ ಸಾಲೆ ಕಲ್ಪಾದ್ ಇನಿ ಕಲ್ತ್ದ್ ಈ ಊರ್ ಅತ್ತ್ ದೇಸೊನೇ ಬುಡ್ದು ಏಲ್ ಕಡಲ್ ಆಂಚಿದ ಅಮೆರಿಕೊಡು ಉಪ್ಪುನ ಎನ್ನ ಮಗೆ ಚಿತ್ತುವಾ...? ಅತ್ತ್ ಆಯೆ ಮೋಕೆ ಮಲ್ತ್ದ್ ದೂರದ ಊರುಡೇ ಮದ್ಮೆ ಆಯಿನ ಆಯನ ಬೊಡೆದಿ ಎನ್ನ ಮರ್ಮಲ್, ಪಂಚವಟಿ ಪ್ರಸಂಗೊಡು ಮಾಯಾ ಶೂರ್ಪನಖಿ ಲೆಕ್ಕ ಬತ್ತಿನ ... ವನಿತನಾ?...
ಮಗೆ ಚಿತ್ತು ಏಳನೇ ಪಾಸಾನಗ ಚಿನ್ನೆ 'ನನ ಯಾವು ಮಗ ಬರವು'ಂದ್ ಪಂಡೆ 'ಇಜ್ಜಿ ಅಮ್ಮೆರೆ ಎಂಕ್ ಪತ್ತನೆ ಮುಟ್ಟ ಕಲ್ಪೊಡು'ಂದ್ ಚಿತ್ತು ಅರ್ಗಂಟ್ ಮಲ್ಪುನಗ ಚಿನ್ನೆ ದೂರದ ಮಲ್ಲ ಸಾಲೆಗೆ ಕಡಪುಡ್ದಿತ್ತೆ. ಹೊಟೇಲ್ದ ಕಾಮತೆರ್, ರೇಷನ್ ಅಂಗಡಿದ ಸೆಟ್ರ್, ಗಡಂಗ್ದ ದೂಜನ್ನೆ ಮೊಕಲೆಡ ಮಾತಾ ಒಂತೆ ಒಂತೆ ಪಣವು ಗೆತ್ತೊಂದು ಬೂಕು ಮಾತ ದೆತ್ತ್ ಕೊರಿಯೆ. ರಾಮಯಣ್ಣೆ ವರ್ಷಗೊಂಜಿ ಜತೆ ಅಂಗಿ ಚೆಡ್ಡಿ ಪೊಲ್ಲಾದ್ ಕೊರಿಯೆರ್. ಎಡೆನ ಬಂಙ ಬತ್ತ್ದ್ ಕಲ್ತಿನ ಚಿತ್ತು ಪತ್ತನೆತ್ತ ಪರೀಕ್ಷೆಡ್ ಸಾಲೆಡೇ ಒಂಜನೇ ನಂಬರ್ಡ್ ಪಾಸಾಯೆ.
'ಯಾವು ಮಗ ನನ ದುಂಬುದ ಸಾಲೆ ನಮ್ಮಂಚಿನಕ್ಲೆಗ್ ಪಂತಿನವು ಅತ್ತ್' ಚಿನ್ನೆ ಪನ್ನಗ 'ಎಂಕ್ ಪದ್ರಾಡ್ನೆ ಕಲ್ಪೊಡೆ ಪಂದ್' ಹಠ ಪತ್ತಿಯೆ ಚಿತ್ತು. ಇಂಬ್ಯೆಗೊಂತೆ ರಾಮಯಣ್ಣೆ ಆಂಡಲಾ ಬುದ್ದಿ ಪನಡ್ ಪಂದ್ ರಾಮಯಣ್ಣನ ಇಲ್ಲಗ್ ಚಿತ್ತುನು ಲೆತ್ತೊಂದು ಪೋಯೆ ಚಿನ್ನೆ.
ರಾಮಯಣ್ಣನ ಇಲ್ಲಡ್ ಆ ದಿನ ಬೂತೊಲೆಗ್ ತಂಬಿಲ ನಡಪ್ಪುನ ದಿನ. ಬೊಂಬಾಯಿಗ್ ಬಲ್ತ್ದ್ ಪೋಯಿನ ರಾಮಯಣ್ಣನ ಪಲಯೆ, ದಿಲ್ಲಿ, ಬೆಂಗ್ಳೂರುದಕ್ಲು ಮಾತಾ ಇಲ್ಲಡ್ ಸೇರ್ದಿತ್ತೆರ್ ಅಕುಲು ಮಾತಾ ಸೇರ್ದ್ ಊರುದ ರಾಜಕೀಯದ ಪಟ್ಟಾಂಗ ಪಾತೆರೊಂದಿತ್ತೆರ್. 'ನಮ್ಮ ಹಳ್ಳಿದ ಜನಕ್ಲೆಗ್ ವಿದ್ಯೆ ಕೊರೊಡು ಹಳ್ಳಿಡ್ದೇ ದಿಲ್ಲಿ ಪಂದ್ ಗಾಂಧಿಯೆರ್ ಪಂತೆರ್'ಂದ್ ಬೊಂಬಾಯಿದ ಪಲಯೆ ಪನ್ನಗ ರಾಮಯಣ್ಣಗ್ ಒಂತೆ ಪಿಸಿರ್ ಬತ್ತ್ಂಡ್ ಹಳ್ಳಿಡ್ ಬೆನಿಯರೆ ಬೆರಿ ಬಗ್ಗಂದೆ ಬೊಂಬಾಯಿಗ್ ಬಲ್ತಿನ ಇಂಬ್ಯೆ ಪಾತೆರುನ ಕೋಮಟ್ಟಿಗೆದ ಪಾತೆರ ಕೇಂದ್ ಮನಸ್ಸ್ ಡ್ ಕೊದಿ ಉರ್ಕರ್ಂಡ್. `ಅಂದ್ ಅಣ್ಣಾ ಈ ಪಂಡಿನ ಸರಿ ಹಳ್ಳಿಡ್ದೇ ದಿಲ್ಲಿ ಅವು ಸಮ. ಆಂಡ ಹಳ್ಳಿದ ಚಿತ್ತುನಂಚಿನ ಉಸಾರ್ದ ಜೋಕ್ಲೆಗ್, ಕಲ್ಪರೆ ಗತಿ ದಾಂತಿನಕ್ಲೆಗ್ ನಿಕ್ಲು ಬೊಂಬಾಯಿದ ದುಡ್ಡುದಕ್ಲು ಏತ್ ಸಾಯ ಕೊರ್ಪರ್?, ಪೊಕ್ಕಡೆ ಗಾಂದಿಯೆರ್ ಆರ್ ಮೇರ್ ಪಂದ್ ಬಂಡಲ್ ಬುಡ್ಪಿನಿ ದಾಯೆ ಮಾರಾಯಾ?`ಂದ್ ಪನ್ನಗ ರಾಮಣ್ಣನ ಪಲಯೆ ಚಿತ್ತುನಂಚಿ ತೂದು `ಅಂದಾ ಬಾಲೆ ನಿಕ್ಕ್ ಕಲ್ಪೆರೆ ಮನಸ್ಸ್ ಉಂಡಾ?` ಪಂದ್ ಕೇನ್ವೆರ್. `ಅಂದ್ ಅಣ್ಣಾ ಯಾನ್ ಶಾಲೆಡ್ ಒಂಜನೇ ನಂಬರ್ಡ್ ಪಾಸಾತೆ ಎಂಕ್ ಪಿಯುಸಿ ಮಲ್ಪೊಡುಂದು ಉಂಡು`ಂದ್ ಚಿತ್ತು ಪನ್ನಗ. ರಾಮಯಣ್ಣನ ಪಲಯೆ 'ಅಪಗಾಂಡ ಈ ಎನ್ನೊಟ್ಟಿಗೆ ಬೊಂಬಾಯಿಗ್ ಪಿದಡ್ ನಿಕ್ಕ್ ಯಾನ್ ಕಲ್ಪಾವೆಂದ್' ಪಂಡೆರ್. ಉಂದ್ನ್ ಕೇಂಡ್ದ್ ಚಿನ್ನನ ತಿಗಲೆ ಧಸಕ್ ಪಂಡ್. ಇತ್ತಿನ ಒಯರ್ೆ ಮಗೆ ಇನಿ ದೂರದ ಬೊಂಬಾಯಿಗ್ ಪಿದಾಡಿಯೆಡ ಎಂಕ್ ಏರ್ ಉಂಡುಂದ್ ಎನ್ನಿಯೊಂದು ಆಯೆ ರಾಮಯಣ್ಣನ ಮೋನೆ ತೂಯೆ.
`ಓ... ಬೊಂಬಾಯಿದ ಅಣ್ಣನಕ್ಲೆನ ಬಿಸರ್ಾತಿಗೆ ಮಾತ ಯಾವು. ದಾನೆ ಈತ್ ಉಸಾರ್ದ ಆಣನ್ ಬೊಂಬಾಯಿಗ್ ಲೆತ್ತೊಂದು ಪೋದು ಕೋಪಸ್ ದೆಕ್ಕಾವುನ ಅಂದಾಜಿ ಮಲ್ದನ. ಅವು ಮಾತ ಆವಂದ್ ನಿಕ್ಕ್ ತೀರ್ಂಡ ಆಯಗ್ ಊರುಡೇ ಕಲ್ಪರೆ ದುಡ್ಡು ಕೊರು ಪೊಕ್ಕಡೆ ಬೊಂಬಾಯಿಗ್ ಲೆತ್ತೊಂದು ಪೋದು ಆಣನ್ ಬೊಡಿ ದೆಪ್ಪುನ ಬೊಡ್ಚಿ ದಾನೆ. ನಿಕ್ಕ್ ದಾನೆ ಹೊಟೇಲ್ಡ್ ಗಿಲಾಸ್ - ಬಟ್ಟಲ್ ದೆಕ್ಕೆರೆ ಬೇತೆ ಜೋಕ್ಲು ತಿಕ್ಕಿಜೆರೊಡೊ` ಸಸಾರೊಡು ಪಂದ್ ಜೋರು ತೆಲ್ಪುನಗ ರಾಮಯಣ್ಣನ ಪಲಯಗ್ ಅಡೆಗೆ ಮೀಸೆ ಪತ್ತ್ದ್ ಒಯ್ತಿಲೆಕ್ಕ ಆಂಡ್. `ರಾಮಾ ಆತ್ ಮಾತಾ ಪಾತೆರೊಚ್ಚಿ ದಾನೆ ಆಯ ದಾದ ಇಂಜಿನಿಯರ್ ಆಪೆಗೆನಾ? ಅತ್ತ್ ಡಾಕ್ಟರ್ ಆಪೆಗೆನಾ? ಪನಡ್ ಯಾನ್ ಇತ್ತೆ ಖಾಲಿ ಚೆಕ್ಗ್ ದಸ್ಕತ್ ಪಾಡ್ದ್ ಕೊರ್ಪೆ ಆಯಗ್ ಕಲ್ಪೆರೆ ಏತ್ ಬೋಡು ಆತ್ ರುಪಾಯಿ ಬರೆವಡ್` ಪಂದ್ ಮೀಸೆ ತಿಗರ್ಾದ್ ಪಂಡೆರ್. `ತುಕ ಅಂಚಾಂಡ ಇತ್ತೆ ಪತ್ತ್ ಸಾರ ಪೀಂಕಾವು ತುಕ` ಭೂತ ಪತ್ತ್ನಗನೇ ಕಡ್ತೊನೊಡು, ಬೊಕ್ಕ ಕಡ್ತೊಂಡ ಮುಂಡ ಪುಡಾವುಂದ್ ಎನ್ನಿದ್ ರಾಮಯಣ್ಣೆ ತೆಲ್ತೊಂದು ಪಂಡೆರ್.
`ಬಾಲೆ ಚಿತ್ತು ಇಡೆ ಬಲ` ರಾಮಯಣ್ಣನ ಪಲಯೆ ಕಿಸೆಡ್ದ್ ಕಾಸ್ ದೆತ್ತ್ ಚಿತ್ತುನ ಕೈಕ್ ಕೊರ್ದು 'ಇಂದಾ ಯಾನ್ ಬೊಂಬಾಯಿಗ್ ಪೋದು ಕೊಪಸ್ ದೆಕ್ಕ್ದ್ ಎಡೇನ ಬಂಙ ಬತ್ತ್ದ್ ಹೊಟೆಲ್ ದೀದ್ ಇತ್ತೆ ಒಯಿಕ್ಕ್ಲಾ ಕಮ್ಮಿ ಇಜ್ಜಾಂದಿನಾತ್ ಸಂಪಾದನೆ ಮಲ್ದೆ. ನಿನ್ನಂಚಿನ ಬಿರ್ಸಗ್ ಸಾಯ ಮಲ್ತ್ಂಡ ಎಂಕ್ ದೇವೆರ್ ದಾಲಾ ಕಮ್ಮಿ ಮಲ್ಪಯೆರ್. ಈ ಪದ್ರಾಡ್ನೆಟ್ಟ್ ಎಡ್ಡೆ ನಂಬರ್ ದೆತ್ತ್ದ್ ಪಾಸ್ ಆಯಡ ಈ ಎಂಚಿನ ಆಪ ಡಾಕ್ಟ್ರಾಪನಾ?, ಇಂಜಿನಿಯರ್ ಆಪನಾ? ಪನ್ ಯಾನ ಮಲ್ಪುವೆ`ಂದ್ ಪಂಡೆರ್. ರಾಮಯಣ್ಣೆ `ಇತ್ತೆ ನಿಕ್ಲು ಪಾತೆರ್ನ ಸಾಥರ್ೊಕ ಆಂಡ್, ಅಂದಯಾ ಚೆನ್ನ ನನ ನಿಕ್ಕ್ ದಾದ ಆವೊಡು ಮಗನ್ ಸಾಲೆಗ್ ಕಡಪುಡೊಲಿಯತ್ತಾ`ಂದ್ ಪಂಡೆರ್, ಚಿನ್ನ ಮೋನೆ ತೆಲಿಕೆಡ್ ದಿಂಜಿದ್ ಪೋಂಡು. ರಾಮಯಣ್ಣೆ ಇಂಚ ಬೊಲ್ನ್ನೆಯಿಡ್ದ್ ಕುಜಾಲ್ ಒಯ್ತ್ ದೆತ್ತಿಲೆಕ್ಕ ಆಯಗ್ ಸಾಯ ದೆತ್ತ್ ಕೊರ್ಪೆರ್ಂದ್ ಆಯೆ ಕನ ಮನೊಟ್ಟುಲಾ ಎನ್ನಿದಿತ್ತಿಜೆ `ಆವನ್ನ ನಿಕ್ಲೆನ ಉಪಕಾರ ಏಪಲಾ ಮದಪಯೆ` ಚಿನ್ನೆ ಉರ್ಕರಿ ಮನಸ್ಸ್ಡ್ ಪಂಡೆ.
ಚಿತ್ತು ಕಾಲೇಜಿಗ್ ಪೋಯೆರೆ ಸುರು ಮಲ್ತೆ. ಎಡೇನ ದುಡ್ಡುದಕ್ಲೆನ ಜೊಕ್ಲೆನ ನಡುಟ್ಟ್ ಚಿತ್ತುನ ಮನಸ್ಸ್ ಎಲ್ಲಿ ಆಯೆರೆ ಸುರುವಾಂಡ್ ಹೊಟೇಲ್ ಕಾಮತೆರ್ನ ಮಗೆ ಬೊಕ್ಕ ರೇಷನ್ ಶೆಟ್ರೆನ ಮಗೆ ಒಟ್ಟಾದ್ ಚಿತ್ತುಗು ಮುಕ್ಕಾಲ್ದಕ್ಕೆರೆ ಸುರುಮಲ್ತೆರ್. 'ಊರ್ದಕ್ಲೆಡ ಮಾತಾ ದುಡ್ಡು ನಟ್ಟ್ದ್ ಈ ಕಲ್ತ್ದ್ ದಾದ ಮಲ್ಪುವಯಾ.. ನಿನ್ನ ಅಜ್ಜೆ ಕುರ್ಲರಿ ಕುಂಞಪ್ಪ, ಅಮ್ಮೆ ಚಮರ್ುರಿ ಚಿನ್ನೆ. ಈ ನನ ಚಾಟ್ದ ಬೇರ ಸುರುಮಲ್ಪೊಡು ಅಪಗ ನಿಕ್ಕ್ 'ಚಾಟ್ ಚಿತ್ತು'ಂದ್ ಪುದರ್ ಬರ್ಪುಂಡು'. ಉಂದೆನ್ ಕೇಂಡಿನ ಚಿತ್ತುನ ಮನಸ್ಸ್ಗ್ ತೂ ದೀಲೆಕ್ಕ ಆಂಡ್. ಆಯೆ ಚಿನ್ನಡ ಪಂಡೆ 'ಅಮ್ಮೆರೇ ಇರೆಗ್ ಆಟದವುಲು ಮಾತಾ ಚಮರ್ುರಿತ್ತ ಸಂತೆ ಕೊನೊಪಿನೆನ್ ಉಂತಾದ್ ಬೇತೆ ದಾಲ ಬೇಲೆ ಮಲ್ಪೆರೆ ಆವಂದೇ?'. ಚಿನ್ನನ ಉಡಲ್ಗ್ ಬಿಸತ್ತಿ ಪಾಡಿಲೆಕ್ಕ ಆಂಡಲಾ ಆಯೆ ಮನಿತ್ತ್ಜೆ ಬಾಲೆ ದಾದನಾ ಪಾತೆರೊಂದುಲ್ಲೆ ಪಂದ್ ಅಡೆಗೆ ತೆಲ್ತೆ. 'ಆವು ಮಗ ಈ ನನ ಕಲ್ತ್ದ್ ಎಡ್ಡೆ ಬೇಲೆ ತಿಕ್ಕಿ ಬೊಕ್ಕ ಈ ಬೇರೊನು ಯಾನ್ ಬುಡ್ಪೆ 'ಂದ್ ಪಂಡೆ.
ಕಾಮತೆರ್ನ ಬೊಕ್ಕ ಶೆಟ್ರೆನ ಜೋಕ್ಲೆಗ್ ಬುದ್ದಿ ಕಲ್ಪಾವೊಡ್ಡ ಯಾನ್ ಆಕ್ಲೆಡ್ದ್ ಎಚ್ಚ ಮಾಕರ್್ ದೆಪ್ಪೊಡು ಪನ್ಪಿನ ಚದಿ ಚಿತ್ತುಗು ಪುಟ್ಟುಂಡು. ಶೆಟ್ರೆನ ಮಗೆ ಅದರ್ೊಡೆ ಸಾಲೆ ಬುಡಿಯೆ. ಪಿಯುಸಿದ ಪರೀಕ್ಷೆಡ್ ಕಾಮತೆರ್ನ ಮಗೆ ಗೋತ ಪಾಡಿಯೆಡ ಚಿತ್ತು ಒಂಜನೇ ನಂಬರ್ಡ್ ಪಾಸ್ ಆಯೆ. ರಾಮಯಣ್ಣೆ ಬೊಂಬಾಯಿಗ್ ಪೋನು ಮಲ್ತ್ದ್ 'ಚಿತ್ತು ಒಂಜನೇ ನಂಬರ್ಡ್ ಪಾಸಾತೆ ಆಯಗ್ ತೊರ್ತಲ್ದ ಮಲ್ಲ ಶಾಲೆಡ್ ಇಂಜಿನಿಯರ್ ಆಯೆರೆ ಸೀಟ್ ತಿಕ್ಕ್ದ್ಂಡ್'ಂದ್ ಪನ್ನಗ. 'ಕಲ್ಪಡ್ ಆಯನ ಖಚರ್ಿ ಮಾತಾ ಯಾನ್ ತೂಪೆಂ'ದ್ ರಾಮಯಣ್ಣನ ಪಲಯೆ ಪಂಡೆರ್.
ಚಿತ್ತು ಕಂಪ್ಯೂಟರ್ ಇಂಜಿನಿಯರಿಂಗ್ ಕಲ್ತೆ. ಆಂಡ ಆಯನ ಮನಸ್ಸ್ದುಲಾಯಿ ಒಂಜಿ ನಮುನೆದೆ ಅಲ್ಪತನದ ಬಿತ್ತ್ ಬೂರ್ದು ಕೊಡ್ಡಿದಿನವು ಬಲತೊಂದೇ ಬತ್ತ್ಂಡ್. ಆಯೆ ಆಯನ ದೋಸ್ತಿನಕ್ಲೆಡ ಎರೆಡಲಾ ಅಮ್ಮೆರೆನ ಬೇಲೆ ದಾದ ಪಂದ್ ಪನೊಂದಿತ್ತ್ಜೆ. ಆಟ ನೇಮೋಗು ಊರುಡ್ದು ಊರುಗು ಸಂತೆ ಕೊನೊಪಿನಾಯನ ಮಗೆ ಪಂಡ ದೋಸ್ತಿನಕುಲು ರಂಗ್ ಮಲ್ಪುವೆರ್ ಪಂದ್ ಎನ್ನೊಂದಿಲೆಕ್ಕನೇ ಆಯಗ್ ಚಿನ್ನನ ಚಮರ್ುರಿತ್ತ ಬೇರದ ಮಿತ್ತ್ ಪಗೆ ಪುಟ್ಟುಂಡು. ಚಿನ್ನೆನ ಚಮರ್ುರಿತ ಸಂತೆ ಇತ್ತಿನ ವಾ ಆಟ ಕೂಟೊಗುಲಾ ಚಿತ್ತು ಪೋಪಿನೆನೇ ಬುಡ್ದು ಬುಡಿಯೆ ಉಂದು ಚಿನ್ನಗ್ ಗೊತ್ತಾದ್ ಆಯೆ ಮನಸ್ಸ್ದುಲಾಯೇ ಕರಗೆರೆ ಸುರು ಮಲ್ತೆ. 'ಛೇ ಉಂದೆಂಚ್ಚಿನ ವಿದ್ಯೆ. ನಂಕ್ ನುಪ್ಪು ಕೊರಿನ ಬೇಲೆನೇ ತಾತ್ಸಾರ ಮಲ್ಪುನ ವಿದ್ಯೆನ್ ಯಾನ್ ದಾಯೆ ಚಿತ್ತುಗು ಕಲ್ಪಾಯೆರೆ ಪೋಯೆನಾ ಯಾನ್ ತಪ್ಪು ಮಲ್ತೆನಾ ದಾಂನಾ.. ನನ ಚಿತ್ತುಗು ಎಡ್ಡೆ ಬೇಲೆ ತಿಕ್ಕ್ದ್ ಪರವೂರುಗು ಪೋಯೆಡ ಬೊಕ್ಕ ಎನ್ನ ಕೈತಡೆ ಪಿರ ತಿಗರ್್ದ್ ತೂವೆನಾ' ಪನ್ಪಿನ ಪೋಡಿಗೆ ಸುರುವಾಂಡ್. ಲಚಿಮಿಡ ಪಂಡ್ದ್ ಮನಸ್ಸ್ದ ದುನ್ನ ಕಮ್ಮಿ ಮಲ್ಪೆರೆ ತೂಯೆ. ಸಾಧ್ಯ ಆವಂದೆ ರಾಮಯಣ್ಣಡ ದುಃಖ ದೆತ್ತೆ. 'ಜವನ್ಯೆರ್ ಎಂಚಿನಲಾ ಪನಡ್ ಚಿನ್ನ ನಮ ಮಲ್ಪುನ ಬೇಲೆ ಬುಡಿಯೆರೆ ಆಪುಂಡಾ?. ಇತ್ತೆತ್ತೆದ ಜವನ್ಯೆರೆ ನಾಲಚ್ಚರ ಕಲ್ತಿ ಪೆಟ್ಟಿಗೇ ದುಂಬುದೆನ್ ಮಾತಾ ಮದತ್ತ್ ಬುಡ್ಪೆರ್. ಕಾಲ ಅಂಚೆನೆ. ನಿಕ್ಕ್ ಇತ್ತೆ ದಾಲಾ ನಷ್ಟ ಆತ್ಜತ್ತಾ. ತೂಕ ಆಯೆಗ್ ಬೇಲೆ ತಿಕ್ಕಡ್ ಅಲ್ತ್ ಬೊಕ್ಕ ಬೋಡ್ಡ ಈ ನಿನ್ನ ಬೇರೋನು ಬುಡು ಮಾರಾಯ ಇತ್ತೆ ದಾಯೆ ಮಂಡೆಬೆಚ್ಚ ಮಲ್ಪುವ?.' `ಅಂಚತ್ತ್ ರಾಮಯಣ್ಣ ಯಾನ್ ತೂಲೆ ಎನ್ನ ಅಮ್ಮೆರ್ ಮಲ್ತಿನ ಬೇಲೆಗ್ ಏತ್ ಮರ್ಯಾದಿ ಕೊರ್ದು ದುಂಬುಕೊನೆಯೆ ಎನ್ನ ಮಗನ್ ತಾಂಕಿಯೆ ಆಂಡ ಆಯೆ?... ಆಯೆ ಆ ಬೇರ ಮಲ್ಪುನ ಬೊಡ್ಚಿ ಅವೆನ್ ಯಾನ್ಲಾ ಮಲ್ಪೆರೆ ಬಲ್ಲಿ ಪಂದ್ ಪನೊಂದುಲ್ಲೆತ್ತಾ ಉಂದು ನ್ಯಾಯನಾ? ಎನ್ನ ದೊಕ್ಕೆ ಇತ್ತಿನೆಟ್ಟ ಯಾನ್ ಈ ಬೇರೊನು ಬುಡಯೆ ಈರ್ ಎಂಚಿನಲಾ ಪನ್ಲೆ ಎನ್ನ ಜೂವಾಂಡಲಾ ಬುಡುವೆ ಈ ಬೇರೊನು ಮಾತ್ರ ಬುಡಯೆ' ಚಿನ್ನೆ ಗಟ್ಟಿಯಾದ್ ಪಂಡೆ.
ಚಿತ್ತುನ ಇಂಜಿನಿಯರಿಂಗ್ ಕಲ್ತ್ದ್ ಮುಗಿಯೊಡ್ಡ ದುಂಬೇ ಆಯಗ್ ಬೊಂಬಾಯಿದ ಮಲ್ಲ ಕಂಪೆನಿಡ್ ಬೇಲೆ ತಿಕ್ಕ್ಂಡ್. ಅಕೇರಿದ ವರ್ಸ ಕಲ್ತೊಂದುಪ್ಪುನಗನೇ ಸಾರ ಸಾರ ಸಂಬಳ ತಿಕ್ಕ್ಂಡ್. ಕಲ್ತ್ನ ಮುಗಿನೆತ್ತ ಮನದಾನಿಯೇ ಆಯೆ ಬೊಂಬಾಯಿಗ್ ಪಿದಾಡ್ದ್ ಉಂತಿಯೆ. ಚಿನ್ನನ ತಿಗಲೆನೇ ಬಾಯಿಗ್ ಬತ್ತಿಲೆಕ್ಕ ಆಂಡ್. ಆಂಡ ದಾದ ಮಲ್ಪುನು ಬಲತ್ತಿ ಮಗನ್ ಇಲ್ಲಡ್ ಕುಲ್ಲಾದ್ ಚಮರ್ುರಿತ್ತ ಬೇರ ಮಲ್ಪು ಪಂಡ ಆಪುಂಡಾ? ಚಿನ್ನೆಲಾ ಲಚುಮಿಲಾ ಬಸ್ತ್ತಡೆ ಮುಟ್ಟ ಪೋದು ಕಣನೀರ್ ದೆತ್ತ್ದ್ ಚಿತ್ತುನು ಬಸ್ ಮಿತಾಪರ್ಾಯೆರ್. `ಬೊಂಬಾಯಿಗ್ ಪೋಯಿನ ಸುರುಕ್ಕೇ ರಾಮಯಣ್ಣನ ಪಲಯನಡೆ ಪೊಯೆರೆ ಮದಪಡಾ ಮಗಾ'ಂದ್ ಚಿನ್ನೆ ಪಂಡೆ. 'ಆವು ಅಮ್ಮೆರೆ ಆಂಡ ಈರ್ ಆಯಿನಾತ್ ಬೇಗ ನಿದ್ರೆಕಜ್ಜೆರ್ದ ರಾತ್ರಿ ಇಡೀ ತೋಪುಡು ಕೈಲ್ ಆಡಾವುನ ದರಿದ್ರ ಬೇಲೆನ್ ಉಂತಾಲೆ' ಚಿತ್ತು ಚಿನ್ನನ ಮೋನೆ ತೂವಂದೆ ಓಲಾ ತೂದು ಪಂಡೆ. 'ದರಿದ್ರ ಬೇಲೆ........' ಚಿತ್ತುನ ಪಾತೆರ ಕೇಂದ್ ಚಿನ್ನಗ್ ಪಿಸಿರ್ ನೆತ್ತಿಗೇರ್ಂಡ್. ಆಂಡಲಾ ಒರಿಯೇ ಮಗನ್ ದೂರದ ಊರುಗು ಕಡಪುಡುನ ಪೊತರ್ುಂದು ಎನ್ನಿದ್ ಅಡೆಗೇ ಸಮಾಧಾನ ಆಯೆ. ಚಿನ್ನೆ - ಲಚುಮಿನ ಕಾರ್ ಪತ್ತ್ದ್ ಬಸ್ಸ್ ಮಿತ್ತರ್ದ್, ಕೈ ಬೀಜಾವೊಂದು ಚಿತ್ತು ಬೊಂಬಾಯಿಗ್ ಪೋಯೆ.
ಬೊಂಬಾಯಿಗ್ ಪೋಯಿನ ಚಿತ್ತು ಬೊಕ್ಕ ಊರುಗು ಬರೊಡುಂದಾಂಡ ಚಿನ್ನೆ ಚಮರ್ುರಿತ್ತ ಬೇರ ಬುಡೊಡುಂದು ಹಠ ಪತ್ತಿಯೆ. ಈರೆಗ್ ಏತ್ ಬೋಡ್ಡಲಾ ಕಾಸ್ ಕಡಪುಡುವೆ. ಚಮರ್ುರಿತ್ತ ಬೇರೊನೊಂಜಿ ಬುಡ್ಲೆ ಅಮ್ಮೆರೆ ಪಂದ್ ಪ್ರತಿ ಸತರ್ಿಲಾ ರಾಮಯಣ್ಣನ ಇಲ್ಲಗ್ ಫೋನ್ ಮಲ್ತ್ದ್ ಸುಖ ಕಷ್ಟ ಪಾತೆರೊಂದುಪ್ಪುನಗ ಪನ್ಯೆರೆ ಸುರು ಮಲ್ತೆ. ಇಂದೆನ್ ಕೇಂಡಿನ ರಾಮಯಣ್ಣೆ 'ಅಂದಾ ಚಿನ್ನ ನಿಕ್ಕ್ ನನ ದಾದ ಆವೊಡುಯಾ?. ನನಾಂಡಲಾ ಮಗೆ ಪಂಡಿಲೆಕ್ಕ ಕೇನ್ ಮಾರಾಯಾ. ಆಯೆ ದುಡ್ಡು ಕಡಪುಡುವೆಗೆತ್ತಾ. ಈ ದಾಯೆ ರಾತ್ರಿ ಇಡೀ ನಿದ್ರೆ ಕಜ್ಜೆರುವ. ನಿನ್ನ ಮಗೆ ಪನ್ಪಿನಲಾ ಸಮನೇ, ದಾದ ಪನ್ಪ?'ಂದ್ ಕೇಂಡೆರ್.
'ಈರ್ ದಾದ ಪನ್ಪಿನಿ ರಾಮಯಣ್ಣ?, ಆಯನ ಕಾಸ್ ಆಯೆನೇ ದೀವೊನಡ್. ಎಂಕ್ ಬದ್ಕೆರೆ ತಿಕ್ಕಿನ ಸಾದಿನೆ ಆಯೇ ಈ ನಮುನೆ ದಂಟಿಬೊಕ್ಕ ಎನನ್ ದಂಟಂದೆ ಕುಲ್ಲೆನಾ. ನನ ಎಲ್ಲೆ ಬೊಡೆದಿ ಬತ್ತಿಬೊಕ್ಕ ಈ ಪರಬನ್ ಇಲ್ಲ್ ಬುಡ್ದು ಪೋಂದ್ ಪಂಡ ಯಾನ್ ದಾನೋಡು?, ಸಾದಿಡ್ ಬೂರೊಡ.? ದೂರದ ಬೊಂಬಯಿಡ್ ಕುಲ್ಲೊಂದು 'ಬೇರ ಬುಡು.... ಬೇರ ಬುಡು' ಪನ್ಪಿನ ಅಧಿಕಾರ ಆಯಗ್ ದಾದವುಂಡು. ಆಯನ ದುಡ್ಡುನು ಆಯೆನೇ ಗಂಟ್ ಕಟ್ಟಡ್. ಯಾನ್ ಬೇರ ಬುಡ್ಪೆ ಏಪ ಪಂಡ ಯಾನ್ ಸೈತಿ ಬೊಕ್ಕ. ಎಲ್ಲೆ ಯಾನ್ ಸೈತೆಂದ್ ಆಂಡ ಆಯಗೊಂಜಿ ಫೋನು ಮಲ್ತ್ ಪಂಡ್ಲರ್ೆ, ನಿನ್ನ ಅಮ್ಮೆ ಇತ್ತೆ ಎಲಿಮಿನ್ದ ಬಾಜನೊಡು ಕೈಲಾಡವುನ ಬುಡ್ತೆ...ಸೈತ್ದ್ ಪುಣ ಆದ್ ಜೈದೆ. ಆಯನ ಕಾಟೊಗು ತೂ ದೀವೆರಾಂಡಲಾ, ಆಯನ ದೂಪೆಗ್ ನುಪ್ಪು ಪತ್ತೆರಾಂಡಲಾ ಈ ಒರ ಇಮಾನೊಡು ರಾವೊಂದು ಬಲಾಂದ್........' ಭೂತ ಪತ್ತಿಲೆಕ್ಕ ಚಿನ್ನೆ ಪಾತೆರುನೆನ್ ರಾಮಯಣ್ಣೆ ಅಡೆಗೆ ಕಡ್ತೆರ್. ' ಈ ದಾಯೆ ಅಪಸಕುನ ಪಾತೆರ್ನು. ನಿಕ್ಕ್ ದಾನೆ ಕಲ್ಲು ಗುಂಡುದಲೆಕ್ಕ ಉಲ್ಲ. ನನ ನೂದು ವೊರ್ಸ ಬದ್ಕುವ ಪೊಕ್ಕಡೆ ಇಜ್ಜಾಂದಿನ ಮಾತ ಪಾತೆರಡ' ಪಂದ್ ಪನ್ಪೆರ್.
'ಇಂಚಿನ ಒಂಜಿ ಮಗೆನೇ ಯಾವು ರಾಮಯಣ್ಣ ಕಲ್ಲು ಗುಂಡುಗು ಉಳಿ ಪಾಡ್ಯೆರೆ' ಚಿನ್ನೆ ಮುಣ್ಕೊಂದು ಬೀಸ ಬೀಸ ಇಲ್ಲ್ ಜತ್ತ್ ಪೋನಗ ರಾಮಯಣ್ಣೆ ಅಜಪ್ಪಾದ್ ಆಯನ ಬೆರಿನೇ ತೂಯೆರ್. ಅಲ್ತ್ ಬೊಕ್ಕ ಚಿತ್ತುನ ಫೋನು ಬೈದ್ಂಡ್ ಪಂಡ ಚಿನ್ನೆ ಕೆಬಿ ಕೆಪ್ಪು ಮಲ್ತೊಂದಿತ್ತೆ. ಲಚುಮಿ ಮಗಟ್ಟ ಪಾತೆರ್ಯೆರೆ ಬಲ್ತೊಂದಿತ್ತಲ್. ಅಂಚ ಒಂಜಿ ಸತರ್ಿ ಚಿತ್ತುಡ ಫೋನುಡು ಪಾತೆದರ್್ ಬತ್ತಿನ ಲಚುಮಿ 'ಅಂದೆಯೇ ಚಿತ್ತು ಅವೊವ್ವಾ ಅಮೆರಿಕ ದೇಶೋಗು ಪೋಪೆಗೆ. ಕಂಪೊನಿ ಆಯನ್ ಕಡಪುಡುನುಗೆ. ಒಂಜಿ ಲಚ್ಚೊಡ್ದು ಎಚ್ಚ ಸಂಬಳ ನನ ತಿಕ್ಕುಂಡುಗೆಂದ್'ಪಂಡಲ್ 'ಅಮೆರಿಕ ದೇಸನ.. ಪನ್ಪಿನ ಕೇಂದೆ ಅಂಚ ಪಂಡ ವೊಲುಯಾ?' ಚಿನ್ನೆ ಲಚುಮಿಡ ಕೇನ್ನಗ. 'ಎಂಕ್ ದಾನೆ ಗೊತ್ತು ರಾಮಯಣ್ಣಡ ಕೇಂಡೆ. ಅಂಚ ಪಂಡ ಒಲ್ಪಾಂದ್, ಆರ್ ಬಾರೀ ಕುಸಿಟ್ಟ್ ಪಂಡೆರ್. ಅವು ಏಲ್ ಕಡಲ್ದ ಅಂಚಿಗೆ. ಅಡೆಗೆ ಪೋವೊಡ್ಡ ನಮ್ಮ ಚಿತ್ತು ಬಾರಿ ಪುಣ್ಯ ಮಲ್ತೆಂದ್ ಪಂಡೆರ್. ಎಂಕ್ ಒರ ಆಯನ್ ತೂವೊಂಡುಂದು ಆಪುಂಡುಯೇ...' ಲಚುಮಿ ದಂಬು ಕಟ್ಟ್ದ್ ಪಂಡಲ್. 'ಆಯನ್ ಒರ ಬತ್ತ್ ಪೋಯೆರೆ ಪಂತೊಡು....' ಚಿನ್ನೆ ನಗರ್ೊಂದು ಪಂಡೆ. ಲಚುಮಿನ ಮೋನೆ ಎಲ್ಲಿ ಆಂಡ್ 'ಪಂಡೆಯೇ ಆಂಡ......' 'ಆಂಡ..... ಆಂಡ ದಾದಯಾ? ಎನ್ನ ದರಿದ್ರ ಎಲಿಮಿನ್ದ ಬಾಜನ, ಅಯಿಟ್ ಆಡುನ ಕೈಲ್ನ್ ಬೊಳ್ಳೊಗು ಬುಡಿಯೆರೆ ಪಂಡೆನಾ?. ಬೊಡ್ಚಿಯಾ ಆಯೆ ಇಡೆ ಬರ್ಪಿನನೇ ಬೊಡ್ಚಿ.. ಏಲ್ ಕಡಲ್ ಅಂಚಿ ಅತ್ತ್ ಪದ್ನಾಜಿ ಕಡಲ್ ಅಂಚಿ ನಾರಾಯಣ ದೇವೆರೆನ ಲೋಕೊಗು ಪೂವಡ್. ಯಾನ್ ಎನ್ನ ದರಿದ್ರ ಬಾಜನೊನು ಟನ ಟನ ಪಂದ್ ಬೊಟ್ಟೊಂದು ಕುಲ್ಲುವೆ ಪೋವಡಿಯಾ ಪೋವಡ್. ಆಯಗ್ ಆತ್ ಹಠ ಇತ್ತ್ಂಡ ಆಯನ ಅಮ್ಮೆ ಎಂಕ್ ಏತ್ ಉಪ್ಪೊಡು...' ಚಿನ್ನನ ಪಾತೆರೊಗು ಲಚುಮಿನ ಕಣನೀರೇ ಉತ್ತರ ಕೊರುಂಡು.
ಚಿತ್ತು ಅಮೆರಿಕೊಗು ಪೋದು ರಡ್ಡ್ ವರ್ಸ ಕರಿಂಡ್. ಪದಿನೈನ್ ದಿನೊಕ್ಕೊರ ಲಚುಮಿನ್ ರಾಮಯಣ್ಣನ ಇಲ್ಲಡೆ ತಪರ್ಾದ್ ಪೋನುಡು ಪಾತೆರೊಂದಿತ್ತೆ. ಚಿನ್ನೆ ಮಗನ ಸುದ್ದಿನೇ ಪಾತೆರುನ ಬುಡ್ದು ಬುಡಿಯೆ. ಆಟ, ಅಂಕ, ಆಯನ ಬೊಕ್ಕ ಎಡ್ಡೆ ಮರ್ಯಾದಿಡ್ ತೂಪಿನ ಊರುದ ಜನಕ್ಲೆನ ಪ್ರೀತಿ ಇಸ್ವಾಸ ಆಯನ್ ಉಲ್ಲಾಸ್ಡ್ ಉಪ್ಪುಲೆಕ್ಕ ಮಲ್ತೊಂದಿತ್ತ್ಂಡ್. ಒಂಜಿ ಕಾಂಡೆ ಲಚುಮಿ ಚಿತ್ತುಡ ಪೋನುಡು ಪಾತೆರಿ ಬೊಕ್ಕ ಪಾರುನ ನಡಕೆಡ್ ಇಲ್ಲಗ್ ಬತ್ತಲ್. ಇಲ್ಲ ಪಿರಾವುಡು ಗೂಂಟೊಗು ಕಟ್ಟ್ದಿನ ಕೆಮ್ಮೈರೆಗ್ ಬಾರ್ - ನೀರ್ ದೀವೊಂದಿತ್ತಿನಡೆಗೇ ಲಚುಮಿ ಬತ್ತಲ್. 'ಅಂದೆಯೇ ಚಿತ್ತುಗು ಮದ್ಮೆ ಉಂಡುಗೆ...' ಚಿನ್ನಗ್ ಈ ಸುದ್ದಿ ಒರ ಕುಸಿ ಕೊರುಂಡು, ಅಯಿತೊಟ್ಟುಗು ಉದೆಸಿನಲಾ ಆಂಡ್ 'ಆವಡಪ್ಪಾ, ಆವಡ್ ಪದರ್ೆಸಿ ಪೊಣ್ಣುಲು ಬಾರೀ ಸೋಕುಪ್ಪ ಇಂಬ್ಯೆಗ್ ಅಂಗ್ ಅರಿಂಡ್ ತೋಜುಂಡು ಆವಡಪ್ಪಾ ಆವಡ್' ಪಂದ್ ಪನ್ನಗ 'ಅತ್ತ್ಯೇ ಪೊಣ್ಣು ಬಾರೀ ಪೊಲರ್ುದಾಲ್ಗೆ, ಎಡ್ಡೆ ಬೇಲೆ ಅಮೆರಿಕೊಡು ಉಂಡುಗೆ' ಲಚುಮಿ ಪಂಡೊಲು. 'ಅಂದ್ಯಾ, ಕೃಷ್ಣ ದೇವೆರೆನ್ ಕೆರ್ಯೆರೆ ಪೂತನಿ ಎಡ್ಡೆ ರೂಪೊಡು ಎಡ್ಡೆ ಗುಣೊಟ್ಟೇ ಬೈದಿನಿ. ಉಲ್ಲೆರಪ್ಪಾ ಶೂರ್ಪನಖಿ, ತಾಟಕಿನಂಚ ಮಂಗ್ ಮಲರ್್ ಮಲ್ಪುನಕ್ಲೆಗ್ ದಾಲಾ ಕಮ್ಮಿ ಇಜ್ಜಿ. ಬೊಕ್ಕ ಗೊತ್ತಾವು...' ಚಿನ್ನೆ ತಾತ್ಸಾರೊಡು ಪಂಡೆ. 'ಇಜ್ಜಿಯೇ ಪೊಣ್ಣನ ಅಪ್ಪೆ ಇಲ್ಲ್ ನಮ್ಮ ವೊಡಿಪುಗೆ. ನಮ್ಮ ಊರುದಾಲೆಗೆ... ಬೊಂಬಾಯಿಡ್ ಮದ್ಮೆಗೆ. ನಮಕ್ ಇಮಾನಾದ ಎಂಚಿನಪ್ಪಾ.... ರಸೀದಿಯಾ... ಎಂಚಿನನಾ ಕಡಪುಡುವೆಗೆ ನಮ ರಾವೊಂದು ಪೋವೊಡುಗೆ ಲಚುಮಿ ಭಾರಿ ಕುಸಿಟ್ ಪಂಡೊಂದಿತ್ತಿನಾಲ್ ಚೆನ್ನನ ಪಿಸಿರ್ದ ಮೋನೆನ್ ತೂದ್ ಅಡೆಗೆ ಉಂತಾಯಲ್. 'ಪೋಯಾ.... ಈ ರಾವೊಂದು ಅತ್ತ್ ಲಾಗ್ಯೊಂದು ಪೋ... ಎಂಕ್ ದಾನೆ. ಪದಿನೈನ್ ದಿನಕ್ಕೊರ ಪೋನುಡು ಆಯನ್ ಮಾನಾವತ್ತಾ ಈ ಪೋ. ಆಜಿ ತಿಂಗೊಲುಗೊರ ಗಂಟ್ ನಿಕ್ಕ್ ಕಡಪುಡುವೆತ್ತಾ... ಈ ಪೋವೊಡೆ...ಯಾನ್ ಎನ್ನ ಎಲಿಮಿನ್ದ ಬಾಜನ ಆಡವೊಂದು ಮೂಲೆ ಕುಲ್ಲುವೆ' ಚಿನ್ನೆ ಗೌಜಿ ಮಲ್ತ್ ಪಂಡೆ.
ಆನಿ ರಾತ್ರೆ ಲಚುಮಿಗ್ ನಿದ್ರೆನೇ ಬೂರ್ಜಿ. ಉಪ್ಪುನು ಒರಿಯೇ ಮಗೆ ಆಯನ ಮದ್ಮೆಗ್ ಪೋಯಿಜಿಂಡ ಯಾನ್ ಇತ್ತ್ದ್ ದಾನೆ ಪ್ರೇಜನ...ಂದ್ ಎನ್ನೊಂದು ಲಚುಮಿ ಮನದಾನಿ ಪುಲ್ಯಕಾಂಡೆ ರಾಮಯಣ್ಣನ ಇಲ್ಲಡೆ ಪೋದು ಎಡೇನ ಬುಲ್ತಲ್. 'ರಾಮಯಣ್ಣ ಯಾನ್ ಈರ್ನ ಒಪ್ಪ ಪುಟ್ಟಿನ ತಂಗಡಿ ಲೆಕ್ಕ ಅತ್ತೇ... ಎಂಚಾಂಡಲಾ ಅರೆನ್ ಒರ ಬೊಂಬಾಯಿಗ್ ಪೋಯೆರೆ ಒಪ್ಯಾಲೆ. ಯಾನ್ ಈರ್ನ ಕಾರ್ ಪತ್ತುವೆ'ಂದ್ ಕಣ್ಣನೀರ್ ಜಪುಡಾಯಲ್. ರಾಮಯಣ್ಣೆ ಚಿನ್ನನ ಇಲ್ಲಗೇ ಬತ್ತೆರ್. 'ದಾನೆಯಾ ಚಿನ್ನ ಮಗಕ್ಕ್ ಮದ್ಮೆ ಪಂಡ ಈ ದಾನೆ ರಾವಣಲೆಕ್ಕ ಪಿಸರ್ ಪಾತೆರ್ನು... ಈ ಬರ್ಪನಾ ಇಜ್ಜಾ ಎಂಕ್ ಗೊತ್ತುಜ್ಜಿ ಯಾನ್ ಮಾತ್ರ ಲಚುಮಿನ್ ಲೆತ್ತೊಂದು ಇಲ್ಲದಾಲ್ನ ಒಟ್ಟುಗು ಬೊಂಬಾಯಿಗ್ ಪೋಪಿನಿ ಪೋಪಿನೆ. ನಮ್ಮ ಚಿತ್ತುನ ಮದ್ಮೆನ್ ತೂವಂದೆ ಕುಲ್ಲರೆ ಎಂಕ್ ದಾನೆ ಮಲರ್ಾ. ಕುಡೊರ ಫೋನ್ ಬರಡ್ ಇಮಾನದ ನಾಲ್ ಟಿಕೇಟ್ ಕಡಪುಡು ಪನ್ಪೆ'ಂದ್ ರಾಮಯಣ್ಣೆ ಪನ್ನಗ. ರಾಮಯಣ್ಣೆನೇ ಪಿದಾಡ್ದೆರ್, ನನ ಯಾನ್ ದಾಯೆ ಕುಲ್ಲುನು. ಏತಾಂಡಲಾ ಒಯರ್ೆ ಮಗೆ ಅತ್ತಾಂದ್ ಎನ್ನಿಯೊಂದು ಚಿನ್ನೆಲಾ ಪಿದಾಡ್ಯೆರೆ ಒಪ್ಪಿಯೆ. ಎಂಚಲಾ 'ಬೊಂಬಾಯಿಗ್ ಬಲಾ ಬೊಂಬಾಯಿಗ್ ಬಲಾ' ಪಂದ್ ಪನೊಂದಿತ್ತಿನ ಪಲಯನಕ್ಲೆನ ಮೋನೆ ತೂಯಿಲೆಕ್ಕಲಾ ಆಂಡ್ ಪಂದ್ ರಾಮಯಣ್ಣೆ ಒಂಜೇ ಕಲ್ಲ್ಡ್ ರಡ್ಡ್ ಕುಕ್ಕು ತಲ್ತೆರ್.
ಚಿನ್ನೆ ಬೊಂಬಾಯಿಗ್ ಪೋಯೆರೆ ವಿಮಾನೊಡು ಕುಲ್ಲಿಯೆ. ರಾಮದೇವೆರ್ ಲಂಕೆನ್ ಗೆಂದ್ದ್ ಪಿರ ಅಯೋಧ್ಯೆಗ್ ಬನ್ನಗ ಪುಷ್ಪಕ ವಿಮಾನೊಡು ಬರ್ಪಿನ ಪೊರ್ಲುನು ಆಟೊಡು ರಾಮನ ಏಸ ಪಾಡ್ದಿನ ಅಳಕೆ ರಾಮಯ ರೈಕುಲು ಪನ್ತಿನ ಇಚಾರ ಇತ್ತೆ ಚಿನ್ನೆ ನೆನಪು ಮಲ್ತೊಂಡೆ. 'ಉಂದು ರಾವಣನ ಪುಷ್ಪಕ ಇಮಾನನೇ ಅತ್ತೆ ರಾಮಯಣ್ಣ'ಂದ್ ರಾಮಯಣ್ಣಡ ಪನ್ನಗ ಆರ್ ಜೋರು ತೆಲ್ತ್ದ್ 'ನನ ಈ ಅಮೆರಿಕೊಗು ಪೊಯೆರೆ ಉಂಡು ಮಾರಾಯ ಅವು ದೇವೇಂದ್ರನ ಅಮರಾವತಿದ ಲೆಕ್ಕ ಉಂಡು'ಂದು ಪಂಡೆರ್. 'ರಾಮಯಣ್ಣ ಈರ್ ಪಂಡರ್ಂದ್ ಬೊಂಬಾಯಿಗ್ ಎಂಚಲಾ ಪಿದಾಡ್ದೆ ನನ ಅಮೆರಿಕೊಗು - ಗಿಮೆರಿಕೊಗು ಯಾನ್ ಮಿನಿ ಪೋವಯೆ. ಒಯರ್ೆ ಮಗನ ಮದ್ಮೆಗ್ ಪೋಯಿಜಿಡ ಊರುದಕ್ಲ್ ದಾನೆ ಪನ್ವೆರೆಂದ್ ಬರೊಂದುಲ್ಲೆ ಅತ್ತಾಂದೆ ಎನ್ನ ಮಗನ ಪಾತೆರ - ಆಯನ ಸುಪರ್ೊಗತ್ತ್' ಚಿನ್ನೆ ಪಿಸಿರ್ಡ್ ಪಂಡೆ.
ಬೊಂಬಾಯಿ ಚಿನ್ನಗ್ ಸ್ವರ್ಗಲೋಕೊಡ್ದು ಒಂಜಿ ತೂಕ ಕಡಿಮೆದ ಲೆಕ್ಕ ತೋಜಿಂಡ್. ಮಲ್ಲ ಹೊಟೆಲ್ಡ್ ರೂಮು ಮಲ್ತ್ದ್ ಚಿನ್ನ, ಲಚುಮಿ, ರಾಮಯಣ್ಣ ಬೊಕ್ಕ ಅರೆನ ಬೊಡೆದಿನ್ ಕುಲ್ಲಾಯೆಡಲಾ ಚಿನ್ನಗ್ ಮಾತ್ರ ಚಿತ್ತುನ ಮೋನೆ ತೂವೆರೆ ಮನಸ್ಸ್ ಬತ್ತ್ಜಿ. ಲಚುಮಿಗ್ ಭಾರಿ ಕುಸಿ. ಆಲ್ ಚಿತ್ತುನು ಏತ್ ತೂಂಡಲಾ, ಆಯಡ ಏತ್ ಪಾತೆರ್ಂಡಲಾ ಕಡಿಮೆನೇ ಆಯಿ ಲೆಕ್ಕ ಮಲ್ತೊಂದಿತ್ತಲ್. ಎಲ್ಯ ಸಭೆಟ್ಟ್ ಊರುದ ಕಟ್ಟ್ ಪಿಕರ್ಾರ ನಿರ್ಮಲೊಡು ಮದ್ಮೆ ನಡತ್ತ್ಂಡ್. ಧಾರೆ ಮಾತ ಆಯಿಲೆಕ್ಕೊನೆ ಪೊಣ್ಣನ ಅಮ್ಮೆರ್ ಚಿನ್ನನ ಕೈತಲ್ ಬತ್ತ್ದ್ 'ಎಂಚ ಉಂಡು ಚಿನ್ನಪ್ಪಣ್ಣಾ ಈರ್ನ ಚಾಟ್ ಸೆಂಟರ್ದ ಬಿಸಿನೆಸ್. ಕುಡ್ಲಡ್ ಒಲ್ಪಾಂಡ್ ಈರ್ನ ಅಂಗಡಿ. ಬೇರ ಮಾತ ಎಂಚ ಉಂಡುಂದು ಕೇಂಡೆರ್'. ವಾ.. ಮಗೆ ಚಮರ್ುರಿತ್ತ ಬೇರ ಪಂದ್ ಪನ್ಯೆರೆ ನಾಚಿಕೆ ಆದ್ ಬೇತಾ ಎಂಚಿನನಾ ಪಂಡ್ದ್ ಎಡೇನ ರೈಲ್ ಬುಡ್ತೆಂದ್ ಚಿನ್ನೆಲಾ ರಾಮಯಣ್ಣೆಲಾ ಎನ್ನಿಯೆರ್. 'ತೊಂದರೆ ಇಜ್ಜಿ ಅಲ್ತಡೇ ಉಂಡು' ಚಿನ್ನೆ ಮೆಲ್ಲ ನಗರ್ೊಂದು ಪಂಡೆ. 'ಎಂಕ್ ಊರುಡೇ ಗೌಜಿಡ್ ಮದ್ಮೆ ಮಲ್ಪೊಡುಂದು ಮನಸ್ಸ್ ಇತ್ತ್ಂಡ್ ಚಿನ್ನಪ್ಪಣ್ಣ, ಈರ್ ದಾಯಗಾ ಊರುಡು ಮದ್ಮೆ ಮಲ್ಪುನ ಬೊಡ್ಚಿ ಪಂಡರ್ಗೆ' ಪೊಣ್ಣನ ಅಮ್ಮೆರ್ ಪನ್ನಗ ಚಿನ್ನಗ್ ಅಡೆಗೇ ತೆಡಿಲ್ ಆಕಿಲೆಕ್ಕಾಂಡ್. 'ಅವ್ವು ...ಅವ್ವು....' ಪನೊಂದು ದಾದನ ಪನ್ಯೆರೆ ಪೋಯಿನ ಚಿನ್ನೆ ರಾಮಯಣ್ಣನ ಮೋನೆ ತೂಯೆ. ' ಅವುದಾಲಾ ಇಜ್ಜಿ ಅಣ್ಣಾ ಜೋಕ್ಲೆಗ್ ಊರುಡು ಸಮಕಟ್ಟಾವಂದ್ ಪಂದ್ ಮುಲ್ಪನೆ ಆವಡ್ ಪಂದ್ ಚೆನ್ನಪ್ಪಣ್ಣೆ ಪಂಡಿನಿ ಆತೆ' ರಾಮಯಣ್ಣ ಅಡೆಗೇ ಬಸಲೆದ ಬೂರುಗು ಊತ ಕೊರಿಲೆಕ್ಕ ಪಂಡೆರ್. 'ಏತಾಂಡಲಾ ಊರುಡು ಆಪಿನ ಎಡ್ಡೆತ್ತ್ಂಡ್. ನಮ್ಮ ಕುಟುಮದಕ್ಲು, ಬಂಧುಲು, ಊರುದಕ್ಲೆನ ಎದುರುಡು ಆಂಡನೇ ಆಯಿಕ್ಕೊಂಜಿ ಮರ್ಯಾದಿ ಬೊಕ್ಕ ಪೊರ್ಲು' ಪೊಣ್ಣನ ಅಮ್ಮೆರ್ ಪಂಡೆರ್.
ಚಿನ್ನೆ ಕಪ್ಪಾಯಿನ ಮೋನೆನ್ ಮಿತ್ತ್ ದೆತರ್್ಜೆ. ರಾಮಯಣ್ಣ ಇರೆಡ ಪಾತೆರ್ಯೆರೆ ಉಂಡು ಬಲೆಂದ್ ಬರಿಕ್ಕ್ ಲೆತ್ತೊಂದು ಪೋದು ' ಇತ್ತೆನೇ ಊರುಗು ಪಿದಾಡ್ಗ ಪೋಯಿ. ಈ ಕಂದೊಡಿನ ಮದ್ಮೆಲಾ ಬೊಡ್ಚಿ ಮಸಿರಿಲಾ ಬೊಡ್ಚಿ ನಮ ಊರುಗು ಪೋಯಿ'ಂದ್ ಕೋಪೊಡು ನಡುಗುನ ಸೊರೊಟ್ಟು ಪಂಡೆ.. ರಾಮಯಣ್ಣೆ ಸಮಾಧಾನ ಮಲ್ತೆರ್. ಚಿನ್ನಗ್ ವಾ ನಮೂನೆಡ್ಲಾ ಸಮಾಧಾನನೇ ಆಯಿಜಿ. ಪೊರ್ಲು ರುಚಿಕಟ್ಟ್ದ್ ವನಸ್ ಆಯಗ್ ಕೈಪೆ ಆಂಡ್. ಓಡೆಗಾ ತೂವೊಂದು ಮಗೆ-ಮರ್ಮಲೆಗ್ ಆಶೀವರ್ಾದ ಮಲ್ತೆ. ಮದ್ಮೆ ಮುಗಿಲೆಕ್ಕೊನೆ ರಾಮಯಣ್ಣನ ಪಲಯನ ಇಲ್ಲಗೇ ರಾಮಯಣ್ಣನೊಟ್ಟುಗು ಪೋಯೆ. ಬೊಂಬಯಿ ಪನ್ಪಿನ ಸೊರ್ಗ ನರಕೊಡ್ದುಲಾ ಕಡೆ ಆದ್ ಪೋಂಡು ಚಿನ್ನಗ್.
ಊರೂಗು ಬತ್ತಿನ ಚಿನ್ನನ್ 'ಮಗನ ಮದ್ಮೆ ಎಂಚಾಂಡ್ ಚಿನ್ನಪ್ಪಣ್ಣ'ಂದ್ ಏರಾಂಡಲಾ ಕೇಂಡ ಚಿನ್ನನ ಮನಸ್ಸ್ಗೆ ಭಚರ್ಿಡ್ ಕಂತಾಯಿಲೆಕ್ಕಾವೊಂದಿತ್ತ್ಂಡ್. ಆಯೆ ಏರೆಗ್ಲಾ ಉತ್ತರನೇ ಕೊರೊಂದಿತ್ತ್ಜೆ. ಆಂಡ ಬೊಂಬಾಯಿಗ್ ಪೋದು ಬತ್ತಿನ ಲಚುಮಿ ಮಾತ್ರ ಪೂರಾ ಬದಲಾದ್ ಪೋಯಲ್. ಮಗನ ಮದ್ಮೆದ ಸುದ್ದಿನ್ ಬಾರೀ ದಿನಮುಟ್ಟ ಮಾತೆರ್ಡಲಾ ಪನೊಂದಿತ್ತಲ್. ಮರ್ಮಲೆನ್ ಪುಗರ್ಯೆರೆ ಸುರು ಮಲ್ತಲ್. ಚಿನ್ನೆ ಪಿಸ್ರ್ಡ್ ತೂಯೆಡ 'ಈರ್ನ ಪಿಸ್ರ್ ಮಾತಾ ಯಾವುಯೇ ಎಂಕ್ ಮಗೆಲಾ ಮರ್ಮಲ್ಲಾ ಬೋಡು. ಇರೆಗ್ ಇತ್ತೆ ದಾದ ಕಮ್ಮಿ ಆತಿನೆಕ್ಕ್ ಚಮರ್ುರಿದ ಸಂತೆ ಕೊನಪರ್. ಅವೆನ್ ಕೈದ್ ಮಲ್ಪುಲೆಂದ್ ಪನ್ಯೆರೆ ಸುರು ಮಲ್ತಲ್. ಚಿನ್ನೆ ಇತ್ತೆ ಆಯನ ಇಲ್ಲಡೇ ಒಂಟಿಯಾದ್ ಪೋಯೆ. 'ಈ ದಾಯಗ್ ಊರುಗು ಬತ್ತಿನಿ ಚಿತ್ತುನೊಟ್ಟುಗು ಅಮೆರಿಕೊಗು ಪೋತೊಡಿತ್ತ್ಂಡ್, ನಿಕ್ಕ್ ವಾ ನಮುನೆದ ಮದರ್್ ಪಾಡ್ದ್ ನಿನ್ನ ಮಂಡೆ ತಿಗರ್ಾದೆನಾ ಆಯೆ'ಂದ್ ಏತ್ ಗೌಜಿ ಮಲ್ತ್ ನೆರ್ಂಡಲಾ ಲಚುಮಿ ಮಗನ ಬರಿಟ್ಟುಂತುದೇ ಪಾತ್ಯೆರ್ಯೊಲು. ಆಯೆ ಪಂಡಿನನೇ ಸಮಾಂದ್ ಪಂಡೊಲು.
ಒಂಜಿದಿನ ಮಗಟ್ಟ ಫೋನುಡು ಪಾತರ್ದ್ ಬತ್ತಿನ ಲಚುಮಿ 'ಇಂದೇ ವನಿತ ಊರುಗು ನಮನ್ ತೂಯೆರೆ ಬರೊಡುಂದು ಹಠಪತ್ತ್ದಲ್ಗೆ ಆಲ್ ಫೋನುಡು ಪಾತೆರ್ಯೆಲ್ ಈರ್ ಊರ್ಯಕ್ಲೆಕ್ ಮದ್ಮೆದಲ್ತೇ ಒಡೆಗಾ ಪೋತರ್ಂದ್ ಬಾರಿ ಬೇಜಾರ್ ಪಾತೆರ್ಯಲ್. ಚಿತ್ತು ಪಂಡೆ ಈರ್ ಚಮರ್ುರಿತ್ತ ಬೇರ ಬುಡೊಡುಗೆ ಮಗೆ ಬೋಡಾ, ಚಮರ್ುರಿತ್ತ ಬೇರ ಬೋಡಾಂದ್ ಎಲ್ಲೆದುಲಾಯಿ ಪನೊಡುಗೆ. ಈರ್ ಈರ್ನ ಚಮರ್ುರಿಯೇ ಬೋಡು ಪಂದ್ ಪಂಡರ್ಡ ಯಾನ್ ಜೂವನೆ ದೆತ್ತೊನುವೆ. ಎಂಕ್ ಮಗೆ ಬೋಡು ದಾನೆ. ದಾದಾಂದ್ ಈರೇ ಪನ್ಲೆ . ಎಲ್ಲೆ ಕಾಂಡೆ ಪೋನು ಮಲ್ಪುವೆಂದ್ ಪಂತೆ'ಂದ್ ಭೂತ ಎಚ್ಚಿಡ್ ಬತ್ತಿಲೆಕ್ಕ ಪನ್ನಗ ಚಿನ್ನೆ ಅಡೇಗೇ ಭೂಮಿದಡಿಕ್ಕ್ ಪೋಯೆ. ಮನಿಪಂದೆ ಇಲ್ಲ ಜತ್ತ್ದ್ ರಾಮಯಣ್ಣನ ಇಲ್ಲಗ್ ಪೋಯೆ 'ಯಾನ್ ಏರೆಗ್ಲಾ ಬೊಡ್ಚಿ ರಾಮಯಣ್ಣ, ಮಾತೆರೆಗ್ಲಾ ಕಾರ್ದ ಕಜವು ಆಯೆ. ನನ ಈ ಭೂಮಿದ ಮಿತ್ತ್ ಬದ್ಕ್ದ್ ಯಾನ್ ದಾದ ಮಲ್ಪೆರೆ ಉಂಡು, ಯಾನ್ ಊರು ಬುಡ್ದು ಪೋಪೆ ರಾಮಯಣ್ಣ, ಏಪ ಚಮರ್ುರಿತ್ತ ಬೇರ ಬುಡಿಯೆನಾ ಆನಿಗೇ ಯಾನ್ ಸೈತ್ ಪೋಪೆ ರಾಮಯಣ್ಣಾ ಯಾನ್ ದಾದ ಮಲ್ಪೊಡುಂದು ಈರೆ ಪನ್ಲೆಂದ್' ಕಣನೀರ್ ಜಪುಡಾಯೆ. ರಾಮಯಣ್ಣೆ ಒಂಜಿ ಮದ್ದೆನಡ್ದ್ ಬೈಯ್ಯಮುಟ್ಟ ಚಿನ್ನಗ್ ಸಮಾಧಾನ ಪಂಡೆರ್. ಕಡೆಕ್ ಎಂಚಾಂಡಲಾ ಚಮರ್ುರಿತ್ತ ಬೇರ ಕೈದ್ ಮಲ್ಪೆರೆ ಚಿನ್ನೆ ಒಪ್ಪಿಯೆ. ರಾಮಯಣ್ಣಗ್ ಸಮಾಧಾನ ಆಂಡಲಾ ಚಮರ್ುರಿತ್ತ ಬೇರ ಬುಡ್ದು ಇಂಬ್ಯೆ ಬದ್ಕಯೆ, ಜೀವೊಗು ಮಿನಿ ದಾಲಾ ಮಲ್ತೊನುವೆನಾ ಪನ್ಪಿನ ಪೋಡಿಗೆಲಾ ಮನಸ್ಸ್ದ ಒಂಜಿ ಕೋಡಿಡ್ ಉದಿತ್ತ್ಂಡ್... ಚಿನ್ನೆ ಇಲ್ಲ್ಗ್ ಬತ್ತ್ ಲಚುಮಿಡ 'ನಿನ್ನ ಆ ಮಗ ಮಾರಾಯಡ ನಿನ್ನ ಅಮ್ಮೆ ಎಲಿಮಿನ್ದ ಬಾಜನ ಅಟ್ಟೊಗು ಪಾಡ್ದೆ ಈ ನಿನ್ನ ಬೊಡೆದಿನ್ ಲೆತ್ತೊಂದು ಬಲಾಂದ್ ಪನ್'ಂದ್ ಪಂಡೆ.
*****
ಅವ್ವೆ ಇನಿ ಚನ್ನಪ್ಪಣ್ಣನ ಅಕೇರಿದ ಬೇರ. ಇತ್ತಿನ ಪೂರಾ ಕುರ್ಲರಿನ್ ಚಮರ್ುರಿ ಮಲ್ತ್ ಮುಗಿಪ್ಯೆರೆ ಆರ್ ಇನಿ ಅರ್ಧಕ್ರಯೊಗು ಚಮರ್ುರಿ ಕೊರೊಂದುಲ್ಲೆರ್...
ಮನದಾನಿ ಪುಲ್ಯಕಾಂಡೆ ಖಾಲಿ ಮನಸ್ಸ್ಡ್ ಇಲ್ಲಗ್ ಬತ್ತಿನ ಚಿನ್ನೆ ಚಮರ್ುರಿತ್ತ ತೋಪು ಕೈಲ್, ಅಡಿಟ್ ಒಂತೆ ಒರಿದಿನ ಕುರ್ಲರಿತ್ತ ತೊಟ್ಟೆ,,ಉಪ್ಪು,, ಮುಂಚಿದ ಪೊಡಿತ್ತ ದಬ್ಬೆ ಮಾತೆನ್ಲಾ ಒಟ್ಟುಮಲ್ತ್ ಒಂಜಿ ಪುಡಾಯಿದುಲಾಯಿ ಪಾಡ್ಯೆ, ಗ್ಯಾಸ್ಲೈಟ್ದ ಎಣ್ಣೆ ದೆತ್ತ್ದ್ ಪುಡಾಯಿಡ್ ಅಡ್ಡ ಪಾಡ್ದ್ ಪುಡಾಯಿನ್ ತರೆಟ್ಟ್ದೀದ್ ಲೆಂಚಿಡ್ ಅಟ್ಟೊಗು ಮಿತ್ತಾರ್ದ್ ಅಟ್ಟೊದ ಮೂಲೆಡ್ ದೀಯೆ. ಲಚುಮಿ ಕೊರಿನ ಮಲ್ಲಲೋಟೆ ಚಾನ್ ಅರ್ಧಪದರ್್ ಒರಿನ ಅರ್ಧ ಅಂಚೆನೇ ದೀಯೆ. 'ಚಿತ್ತು ಮದ್ದೆನಗ್ ಬರ್ಪೆ ಪಂತೆ ಕೋರಿ ಮಿನಿ ಅಡೊಡ್ಚೆಯೇ' ಲಚುಮಿ ಕೇಂಡಲ್. 'ನಿಕ್ಕ್, ನಿನ್ನ ಮಗಕ್ಕ್, ಮರ್ಮಲೆಗ್ ಎಂಚಿನ ಬೋಡು ಅವು ಮಾತಾ ಮಲ್ತ್ ಪಾಡ್ ಎನಡೆಂಚಿನ ಕೇನುನಿ'ಂದ್ ಪಂಡ್ದ್ ಆಲ್ ತೂವೊಂದಿತ್ತಿಲೆಕ್ಕನೆ ಬೈರಾಸ್ ಪುಗೆಲ್ಗ್ ಪಾಡ್ದ್ ಇಲ್ಲ ಜತ್ತೆ. 'ಅಂದೆಯೇ ಈರೊಡೆ ಪೋಪಿನಿ'ಂದ್ ಲಚುಮಿ ಕೇಂಡಿನಿನ್ ಕೇನ್ದ್ಲಾ ಕೇನಂದಿ ಲೆಕ್ಕ ಮಲ್ತ್ದ್ ಇಲ್ಲದ ಬೇಲಿದ ತಡಮೆ ದಾಂಟಿಯೆ...
ಲಚುಮಿ ಕೂಡುಡಿತ್ತಿನ ಕೋರಿಲೆನ್ ಬುಡ್ನಗನೆ ಒಂಜಿ ಗಟ್ಟಿಮುಟ್ಟುದ ಪೂಂಜನ್ ಪತ್ರ್ದ್ ಪಾಡ್ದಿತ್ತಿನಾಲ್ ಇತ್ತೆ ಅವೆನ್ ಪತ್ತ್ದ್ ಅಯ್ತ ನಾಲಿ ಪೊಜೆಂಕ್ದ, ತೊಲ್ಲುದು ಬಿಚ್ಚಾದ್, ತಜತ್ತ್ದ್ ತುಂಡು ಮಲ್ತಲ್. ಬನ್ನಂಜಲ್, ಅರೆಪ್ಪು ಕಡೆದ್ಕೋರಿನ್ ಪಾಡ್ದ್ ಕೊದ್ಯಯಲ್. ಒಂತೆ ತುಂಡುನು ದೆತ್ತ್ದ್ ಆಜಾಯಲ್, ಪದಿನೈನ್ ದಿನಕ್ಕು ದುಂಬು ಮಲ್ದಿನ ರೊಟ್ಟಿ ಡಬ್ಬೆದುಲಾಯಿ ಉಂಡು ಅವ್ವೇ ಯಾವುಂದು ಎನ್ನಿಯೊಲು. ಪೊತರ್ು ಮಿತ್ತ್ ಮಿತ್ತ್ ಬರೊಂದಿತ್ತಿಲೆಕ್ಕೊನೆ ಕೋರಿದ ಕಜಿಪ್ಪು ತಯಾರ್ ಮಲ್ತ್ದ್ ಬಾಕಿಲ್ದ ಪಿದಾಯಿ ಅಪಗಪಗ ತೂವೆರೆ ಸುರು ಮಲ್ತಲ್. `ಮೇರ್ ಪೋತಿನಾರ್ ಒಡೆಗ್ ಪೋತೆರಾ ನನಲಾ ತೋಜ್ಜೆರ್ಂದ್'ಎನ್ನೊಂದು. ಬಪರ್ಿನ ಮಗೆ ಮರ್ಮಲೆನ್ ಎದ್ಕೊನೆರೆ ತಯಾರ್ ಆಯಲ್.
ಪೊತರ್ು ನೆತ್ತಿಗ್ ಬರಿಯೆರೆ ನನ ಒಂತೆ ಪೊತರ್ುಂಡುಂದು ಆನಗ ಚಿತ್ತು ಬೊಕ್ಕ ವನಿತ ಜಾಲ್ಡ್ ತೋಜಿಯೆರ್. 'ಬತ್ತರಾ ಮಗ ... ಬಲೆ ಬಲೆ' ಪಂದ್ ಇಲ್ಲ ಪಿದಾಯಿ ಬತ್ತ್ ಎದ್ಕೊನಿಯಲ್. 'ಮಾಮ ಇಜ್ಜೆರಾ ಮಾಮೀಂ' ದ್ ಪನೊಂದು ಇಲ್ಲದುಲಾಯಿ ಬತ್ತಲ್ ವನಿತ. ಲಚುಮಿನೊಟ್ಟುಗು ಅಡ್ಪಿಲ್ಗ್ ಪೊಗ್ಗುದು ಸರ್ಬತ್ ಮಲ್ಪೆರೆಂದ್ ಲಿಂಬೆಪುಲಿನ್ ಕೈಯಟ್ ಪತ್ತಿನ ಲಚಿಮಿನ ಕೈಡ್ದ್ ಲಿಂಬೆ ಪುಲಿ ದೆತೊಂದು, ಕತ್ತಿಡ್ ರಡ್ಡ್ ತುಂಡು ಮಲ್ತ್ದ್ ಲಚಿಮಿ ಕೊರಿನ ನೀರ್ಗ್ ಪುಂಟುದು, ಸೆಕ್ಕರದ ಡಬ್ಬೆ ನಾಡ್ದ್ ಸಕ್ಕರೆ ಪಾಡ್ದ್ ನಾಲೈನ್ ಸರಿ ಮಿತ್ತ್ ತಿರ್ತ್ ಆಕ್ದ್ ಲೋಟೆಗ್ ಮೈಯ್ತದ್ ಪಿದಾಯಿ ಕೊನೆದು ಚಿತ್ತುನ ಕೈಕ್ ಕೊರಿಯಲ್. ಲಚುಮಿಗ್ ವನಿತನ ಈ ನಡಕೆ ಬಾರಿ ಕುಸಿ ಕೊರುಂಡು. `ಬಾರಿ ಎಡ್ಡೆಂತಿನ ಪೊಣ್ಣಪ್ಪಾ ಮೋಲು' ಪಂದ್ ಮನಸ್ಸ್ಡೇ ಎನ್ನಿಯೊಲು.
ಪೊತರ್ು ನೆತ್ತಿಗ್ ಬತ್ತ್ಂಡಲಾ ಚಿನ್ನನ ಪತ್ತೆನೇ ಇಜ್ಜಿ. ಲಚುಮಿಗ್ ದಾದ ಮಲ್ಪುನುಂದೇ ತೋಜಿಜಿ. `ವನಸ್ ಮಲ್ಪುಲೆ ಮಗಾಂ'ದ್ ಪಂಡ ವನಿತ `ಮಾಮ ಬರಡ್ ಒಟ್ಟುಗು ಮಲ್ಪುಗಾಂ'ದ್ ಪಂಡಲ್. ಪೊತರ್ು ಪಡ್ಡಾಯಿಗ್ ಜಾರ್ಯೆರೆ ಸುರುವಾಂಡ್ ಲಚುಮಿ ಬುಲಿಪೆರೆ ಸುರುಮಲ್ತಲ್. `ಇತ್ತೆ ಬರ್ಪೆ' ಪಂದ್ ರಾಮಯಣ್ಣನ ಇಲ್ಲಗ್ ಬಲ್ತಲ್. ರಾಮಯಣ್ಣೆ ಲಚುಮಿನೊಟ್ಟುಗೇ ಬತ್ತೆರ್. 'ಇಂಬ್ಯೆ ದಾನೆ ಪಂಡಿಲೆಕ್ಕ ಊರೇ ಬುಡ್ತೆನಾ ಅತ್ತ್.... ಅತ್ತ್.... ಒಲಾಂಡಲಾ....' ರಾಮಯಣ್ಣನ ತಿಗಲೆಡ್ ಬಜಿಲ್ ಮೆದ್ಪೆರೆ ಸುರುವಾಂಡ್.
ಲಚುಮಿನ ಬುಲಿಪು ಜೋರಾಂಡ್. ವನಿತ ಬೊಕ್ಕ ಚಿತ್ತು ಅಲೆಗೆ ಸಮಾಧಾನ ಪನ್ಯೆರೆ ಸುರು ಮಲ್ತೆರ್. ರಾಮಯಣ್ಣೆ 'ಆಯನ್ ಓಲು ಇತ್ತ್ಂಡಲಾ ನಾಡ್ದ್ ಲೆತ್ತೊಂದು ಬರ್ಪೆಂ'ದ್ ಜಾಲ್ ಜತ್ತೆರ್. ಲಚುಮಿ ಚಿನ್ನನ ಮನಸ್ಸ್ದ್ ಬೇನೆ, ಬೇಜಾರ್, ಕೋಪ ಬೊಕ್ಕ ನಡತ್ತಿನ ಕತೆಕ್ಲೆನ್ ಮಾತಾ ವನಿತಡ ಪಂಡ್ದ್ ಬುಲಿಪೆರೆ ಸುರು ಮಲ್ತಲ್.
ದೇವಸ್ಥಾನ, ಪದವುದ ಅಂಗಡಿ, ಹೊಟೆಲ್ ಓಲು ತೂಂಡಲಾ ಚಿನ್ನನ ಪತ್ತೆನೇ ಇಜ್ಜಿ. ಏರೆಡ ಕೇಂಡಲಾ ಗೊತ್ತುಜ್ಜಿಂದೇ ಪಂಡೆರ್. ಪೊತರ್ು ಬೈಯ್ಯಾಂಡ್. ಮಿತ್ತ ಪೇಂಟ್ಡ್ ಆಟ ಉಂಡು ಪಂದ್ ಏರಾ ಪಂಡೆರ್. ರಾಮಯಣ್ಣೆ ನನ ಅವುಲಾಂಡಲಾ ಉಪ್ಪೆನಾ ದಾನಾಂದ್ ತುತರ್ೊಡು ಅಂಚಿ ಪಿದಾಡ್ಯೆರ್. ಆಟದಲ್ಪ `ಚೆನ್ನೆ ಮಿನಿ ಬೈದನಾಂದ್' ಕೇಂಡೆರ್. `ಇಜ್ಜಿ ರಾಮಯಣ್ಣ ಆರ್ನ ಬೇರ ಕೋಡೆ ಅಕೇರಿಯತ್ತೆ ಇನಿ ಬೈದ್ಜೆರ್'ಂದ್ ಸಂತೆದಕ್ಲು ಪಂಡೆರ್. ಉಂದು ದಾದನಾ ಎಚ್ಚಿ ಕಮ್ಮಿ ಖಂಡಿತಾ ಆತ್ಂಡ್ಂದ್ ಎನ್ನಿದ್ ಪೋಡಿಗೆ ಸುರುವಾಯಿನ ರಾಮಯಣ್ಣೆ ನನ ಪಿರ ಪೋಕಾಂದ್ ತಿರ್ಗದ್ ಬನ್ನಗ ಚೌಕಿದಂಚಿ ಪೋಯೆರ್. ಚೌಕಿಡ್ ಪೂಜೆ ನಡಪ್ಯೆರೆ ತಯಾರ್ ಆವೊಂದಿತ್ತ್ಂಡ್ `ಅಂದಾ... ಅವು ಏರ್ ಕುಬಣೂರು ಭಾಗಂತೆರೆಡ ಪಾತೆರುನು... ಚಿನ್ನೆ ಅತ್ತಾ...?' ರಾಮಯಣ್ಣೆ ಒಂಜೇ ಪಜ್ಜೆಡ್ ಅಡೆಗ್ ಬತ್ತೆರ್. ಚಿನ್ನನ ದಂಗ್ಡ್ ಪತ್ತ್ದ್ `ಉಂದು ದಾದ ಮಾರಾಯಾ ನಿನ್ನ ಮಗೆ ಮರ್ಮಲ್, ಬೊಡೆದಿ ಮಾತ ವನಸ್ ಬುಡ್ದು ಉಪಾಸ ಕುಲ್ದು ನಿನನ್ ಕಾತೊಂದುಲ್ಲೆರ್. ಈ ಮುಲ್ಪ ದಾದ ಮಲ್ಪುನು ಇನಿಯಾಂಡಲಾ ಒಂಜಿದಿನ ಇಲ್ಲಡ್ ಉಪ್ಯೆರಾ ಆತ್ಜಾ?. ಬಲ ... ಬಲ ಇಲ್ಲಗ್ ಪೋಯಿ' ಪಂಡೆರ್. `ಮಗೆ ಬತ್ತೆಡ ಪೋವೆ ರಾಮಯಣ್ಣ. ಯಾನ್ ಚಮರ್ುರಿತ್ತ ಬೇರ ಬುಡ್ತೆ, ಆಂಡ ಆಟ ಗೊಬ್ಬಾವುನಕ್ಲೆಗ್ ಸಾಯ ಮಲ್ಪೆರೆಲಾ ಬಲ್ಲೀಂದ್ ಈರೆಡ ಪಂಡ್ದ್ ಕಡಪುಡಿಯೆನಾ ಆಯೆ' ಂದ್ ಚಿನ್ನೆ ಪಿಸಿರ್ಡ್ ಕೇಂಡೆ. `ಈ ಒರ ಇಲ್ಲಗ್ ಬಲ ಮಾರಾಯ ಅವು ಮಾತಾ ಬೊಕ್ಕ ಪಾತೆರ್ಗ' ಪಂಡ್ದ್ ಚಿನ್ನನ್ ಒಯ್ತೊಂದು ಅಲ್ತ್ ಪಿದಾಡ್ಯೆರ್ ರಾಮಯಣ್ಣೆ.
ಚಿನ್ನೆ, ರಾಮಯಣ್ಣನೊಟ್ಟುಗು ಇಲ್ಲ್ ಪೊಗ್ಗಿನೇ ತರೆಕಂತ ಪಾಡ್ದಿನ ಲಚುಮಿ, ಚಿತ್ತು ಬೊಕ್ಕ ವನಿತ ತರೆ ದೆತರ್ೆರ್. ಚಿನ್ನನ್ ತೂದು ಅಕ್ಲೆ ಗ್ ಒರ ಪೋತಿನ ಜೂವ ಬತ್ತಿಲೆಕ್ಕಾಂಡ್. ವನಿತಾ ದಿಡ್ಕ್ಕ ಲಕ್ಕ್ದ್ ಚಿನ್ನನ ರಡ್ಡ್ ಕೈನ್ಲಾ ಪತ್ತ್ದ್ `ಈರ್ ಒಡೆ ಪೋತಿನಿ ಮಾಮಾ'ಂದ್ ಕೇಂಡೊಲು. ಚಿತ್ತುನಂಚಿ ತೂದು `ಲಕ್ಕ್ಲೆಯೇ ಈರ್ ಮಾಮನ ಮನಸ್ಸ್ಗ್ ಕೊರಿನ ಬೇನೆ ಯಾವು, ಪ್ರಾಯದಕ್ಲೆನ್ ಅಂಚಮಾತಾ ಎಂಚೆಂಚಿನ ಪಂಡ್ದ್ಬೊಡಿದೆತ್ತ್ಂಡ ನಮಕ್ಕ್ ಎಡ್ಡೆ ಆವಾ. ಅಕ್ಲೆನ ಆಶೀವರ್ಾದ್ ಇತ್ತ್ಂಡನೇ ನಂಕ್ ಸುಖ. ಈರ್ ಆರ್ನ ತ್ಯಾಗೊಗು, ಇರೆಗ್ ಕಲ್ಪಾದಿನೆಕ್ಕೇ ಬಿಲೆ ಕಟ್ಯೆರೆ ಪಿದಾಡ್ಯರ್. ಈರ್ಲಾ ಪರವೂರುಗು ಪೋದು ಬೇಲೆ ಮಲ್ಪುನು ದುಡ್ಡುಗೇ ಅತ್ತಾ? ಆರ್ಲಾ ಬೇಲೆ ಮಲ್ಪುನು ಅಯಿಕ್ಕೇ ಅಯಿಟ್ ಮಿತ್ತ್ ತಿರ್ತರ್್ ಪನ್ಪಿನ ಬೇಧ ದಾಯೆ? ಬೇಲೆ ಒವ್ವಾಂಡ ದಾನೆ ಒರಿ ನನೊರ್ಯಗ್, ಅಕ್ಲೆನ ಬೇಲೆಗ್ ಮಯರ್ಾದಿ ಕೊರ್ಯೆರೆ ಕಲ್ಪೊಡುಯೇ ಆರ್ನ ಕಾರ್ ಪತ್ತ್ದ್ ಮಾಪು ನಟ್ಟ್ಲೆ'ಂದ್ ಪಿಸ್ರ್ಡ್ ಪಂಡಲ್. ಲಚುಮಿನ ಕಣನೀರ್ ಬೊಕ್ಕ ವನಿತನ ಖಾರದ ಪಾತೆರ ಚಿತ್ತುನ ಕುರೆಪತ್ದಿ ಕುಂಟುದಲೆಕ್ಕಂತಿನ ಮನಸ್ಸ್ ನ್ ಅದರ್ಿಲೆಕ್ಕಾದ್ ಅಯ್ತ ಕುರೆಮಾತಾ ಕರಾದ್ ಪೋಂಡು. ಆಯೆ ಲಕ್ಕ್ದ್ ಬತ್ತ್ದ್ ಚಿನ್ನನ ಕಾರ್ ಪತ್ತಿಯೆ `ಎನ್ನ ತಪ್ಪಾಂಡ್ ಅಮ್ಮೆರೆ, ಈರ್ನ ಮನಸ್ಸ್ಗ್ ಬೇಜಾರ್ ಮಲ್ತೆ, ಈರೆಗ್ ಅಪಮಾನ ಮಲ್ತ್ ಕಣನೀರ್ ಪಾಡುಲೆಕ್ಕ ಮಲ್ತೆ, ಎನನ್ ಮಾಪು ಮಲ್ಪುಲೆ. ಇರೆಗೆಂಚಿನ ಬೇರ ಬೋಡ್ಡಲಾ ಮಲ್ಪುಲೆ ಒಯಿಕ್ಲಾ ಯಾನ್ ಅಡ್ಡಿ, ಇಡ್ಡೂರ ಮಲ್ಪುಜಿಂದ್' ಕಣನೀರ್ ಪಾಡಿಯೆ. ಚಿನ್ನನ ಮನಸ್ಸ್ ತಾಮರೆ ಪೂತ್ತಲೆಕ್ಕ ಅರಲ್ಂಡ್.
`ತುಕ ಲಕ್ಕಿ ಬಡವು ಆಪುಂಡು ವನಸ್ ಮಲ್ಪುಗಾಂದ್' ಲಚುಮಿ ಪಂಡಲ್. `ಮಾಮಿ ಈರ್ ಚವುಲಿ ಆತಿನ ಕೋರಿದ ಕಜಿಪ್ಪುನು ಬೆಚ್ಚ ಮಲ್ಪುಲೆ'. ಎಂಕೊರ ಮಾಮನ ಚಮರ್ುರಿ ತಿನೊಡು ಪಂದ್ ವನಿತ ಪಂಡಲ್. ಚಿನ್ನೆ ಅಟ್ಟಮಿತರ್ದ್ ಪುಡಾಯಿ ತಿತರ್್ ಜಪುಡಾಯೆ. ವನಿತ ಚಮರ್ುರಿದ ಬಾಜನ ದೆಕ್ಕ್ದ್ ಕಂತ್ ಕೊರ್ದು ನೀರುಳ್ಳಿ ಕೊಚ್ಚೆರೆ ಸುರು ಮಲ್ತಲ್. ಚಿನ್ನೆ ಎಣ್ಣೆ , ಮುಂಚಿದ ಪೊಡಿ ಬೊಕ್ಕ ಮಾತಾ ಸೊತ್ತುಲೆನ್ ಪಾಡ್ದ್ ರಡ್ಡ್ ಸರಿ ತಿರ್ಗಾಯೆ. ಕುರ್ಲರಿ ಪಾಡ್ದ್ ಕುಡ ಒಂತೆ ತಿರ್ಗಾನಗ ಚಮರ್ುರಿ ತಯಾರ್ ಆಂಡ್. `ಚಮರ್ುರಿ ಚಮರ್ುರೀಂ'ದ್ ಟನ ಟನ ಬೊಟ್ಟುದು ಜೋರು ತೆಲ್ತೆ. ಮಾತೆರ್ಲಾ ಒಟ್ಟಾದ್ ಕುಲ್ಲೊಂದು ತೆಲಿಕೆ ತೆಲ್ತೊಂದು ಚಮರ್ುರಿ ಪಟ್ಟ್ದ್ ತಿಂಡೆರ್.
ಇತ್ತೆ ಊರುದಕ್ಲು ಮಾತ ಆಟ ನೇಮೊಗು ಪೋಂಡ ಚಿನ್ನಪ್ಪಣ್ಣನ ಚಮರ್ುರಿ ತಿನಂದೆ ಉಪ್ಪುಜೆರ್. ನಿಕ್ಲು ಆಟ, ನೇಮದಂಚಿ ಪೋಯರ್ಡ ಚಿನ್ನಪ್ಪಣ್ಣನ ಚಮರ್ುರಿದ ಸಂತೆದಂಚಿ ಪೋಯೆರೆ ಮದಪ್ಪೊಚ್ಚಿ . ಚಿನ್ನಪ್ಪಣ್ಣನ ಚಮರ್ುರಿ ಇತ್ತೆ ಬಾರೀ ಕೊಡೆಕ್ಕೆನೆ, ಪುಳಿಪ್ಪೆನ.
ನಿಕ್ಲೆಗೆಂಚ ಬೋಡು ಅಂಚ ಚಮರ್ುರಿ ಮಲ್ತ್ ಕೊರೊಂದುಲ್ಲೆರ್ ಚಮರ್ುರಿ ಚಿನ್ನಪ್ಪಣ್ಣೆ.